Na soifua i Samoa le tamaitai faipule o le Palemene o Niue le afioga Vaaiga Tukuitoga, ae na ave i Niue ina ua atoa lona tausaga. Fai mai le tamaitai faipule e ui ina sa ola a‘e i lona atunuu ae lē mafai ona aveesea ai ona lagona o ia o se Samoa auā e iai lona aiga i Samoa o le auaiga o Mamaia i Vaiala.
Sa avea ma faiaoga i lona atunuu ae ina ua litaea sa ia lagona ua tatau ona ulufale i upufai o Niue i le tofi faipule o lona nuu ma lona itumalo. Fai mai le tamaitai faipule sa tele nisi lagona sa faailoa atu e nisi o lona aiga pe afai e lē taunuu lona faamoemoe, ae o lana tala i ai e lē o le mutaaga lea o le soifua finau.
O ia o le uluai tamaitai faipule o le Palemene o lona atunuu ma sa avea ma Minisita o le Kapeneta i le faigamalo ua tuanai. O le taimi nei ina ua suia le faigamalo ua pulea le atinae o Niue ua lē toe filifilia i se tofi minisita.
O lana lui lea i tamaitai o le Pasefika e aofia ai Samoa ina ia aveese nisi mafaufauga ma nisi mafuaaga o nonofo ma latou e mafua ai ona lē fia avea ma faipule o le Palemene ae tutulai mai e siitia le leo o tamaitai i upufai o o latou atunuu.
O Niue e pei ona ia faaalia o le toatele o tamaitai e lē fia oo i le tofi faipule ona e maualalo lava le totogi. O totogi o tofiga o le Malo o loo galulue ai e tetelē ae o faipule o lona atunuu e maualalo lava le totogi e maua ma o le isi lea pogai o le lē fia oo atu o ni tamaitai e faatino le galuega o le lotolotoi i upufai o lona atunuu.
O lona malaga mai i Samoa o le auai i le fonotaga a faipule tamaitai o le Pasefika. O le avanoa na feiloai atu ai i le aufaasalalau na ia faamatala ai ma lona aiga i Samoa. Sa ia faamaonia ai foi o le masina o Novema o le tausaga nei e faamanatu ai i Samoa e tagata Niue le 150 tausaga talu ona nofoia e tagata o lona atunuu Samoa ma le pitonuu na faaigoa o le aai o Niue lea o loo i totonu o le afioaga o Apia.
O le sefulu pasene ua aiaia i le faavae o Samoa e avanoa ai nofoa e lima o tamaitai e avea ma faipule o le Palemene ua faaalia e le tamaitai faipule o le Malo o Niue o Vaaiga Tukuitonga e mafai ona toe sii i se isi pasene maualuga atu.
O le finagalo o le tamaitai faipule sa avea ma Minisita o lona Malo i se tasi o faigamalo a Niue ua mavae na faaalia i se feiloaiga ma tusitala i le tau faaiuiu ai o le fonotaga lona fā a sui faipule tamaitai o le Pasefika ua talimalo ai Samoa i lenei vaiaso.
O le tamaitai faipule mai Niue na soifua i Samoa ae na ave e lona aiga ina ua tasi lona tausaga peitai o loo maua pea fesootaiga ma lona aiga i Vaiala. O ia le uluai tamaitai na avea ma faipule o le Palemene i lona atunuu ma o lana luitau lea i tina ma tamaitai o le Pasefika ia loto tetele ma finau e tausinio e ulufale i upufai o o latou atunuu auā e tāua tele le leo o tamaitai i pulega ma tonu fai o se Malo.
Ua viia e le afioga Vaaiga Tukuitonga le iai o tamaitai faipule e toalima i le Palemene o Samoa lea ua faaopoopo i ai ma le ponesi ua siitia ai taumafaiga a le Malo i le filifilia o se tamaitai faipule ua leva tausaga o seei i le tofi o lona itumalo i le Palemene o le atunuu le afioga Fiame Naomi Mataafa e avea ma Sui Palemia.
O sootaga o le tamaitai faipule i ona sootaga tau toto ivi ma aano i ona aiga i Samoa ua ia faamaonia mai ai, o le masina o Novema o le tausaga nei o le a faamanatu ai e tagata Niue e iai o latou piitaga i Samoa le 150 tausaga talu ona faatuina le nuu ua faaigoa o le aai o Niue i Samoa. Ua saunoa mai le tamaitai faipule e tele tapenaga o loo faia e tagata o lona atunuu o aumau i Niu Sila ma i latou o loo nonofo i le motu mo lea faamoemoe. O le a toe faatasia ai ma o latou aiga i Samoa.
O le afioga Vaaiga Tukuitoga o se tasi o ona tuagane o loo avea nei ma faauluuluga o le ofisa tutotonu o le Komisi o atunuu Pasefika o lona ofisa tutotonu o loo i Noumea le laumua o le atunuu o Niu Kaletonia.
Fai mai le tamaitai faipule e malaga soo mai lava i Samoa i nisi o fuafuaga faaleaiga ma o le faamoemoe o tagata Niue i le masina o Novema e lē misia ai foi lona malaga i Samoa e molimauina ma auai i lea sauniga tāua e lē gata o tagata Niue ae faapea i tagata Samoa ua tala gafa i Niue.
