Ua ese le tulaga ua molimauina i le faafeagai ai o tusitala ma le vaega faaupufai o le Tautua Samoa ina ua feiloai i le amataga o galuega o lenei tausaga fou mo le latou fono masani e faailoa ai mataupu eseese, aemaise o faiga faavae o le a finau ai i le palota tele o loo loma nei.
Na amata le feiloaiga o faasolo le faailoaina o mataupu o faiga faavae a le pati faaupufai, ma e lata i le itula atoa o faasolosolo faipule e aofia ai le taitai ma le sui taitai o sausaunoa i mataupu taitasi. Peitai ina ua aumai le avanoa e fesili atu ai tusitala, na faigata ona faasaosao nisi o fesili ma‘ale‘ale ina ua saunoa mai le taitai le afioga Palusalue Faapo II, e lē toe maua se avanoa o se fesili a lenei tusitala.
Ua ese ai lea tulaga na molimauina ma fesagaiga a le aufaasalalau ma tusitala ma le Tautua Samoa i tausaga ua mavae o le paeaiga a le Palemene o loo iai nei. Ua talitonu nisi tusitala sinia atonu ua mafua lea tulaga ona e manino mai i lea gaioiga a le taitai o le Tautua Samoa, e lē toe soona save‘uina i fesili sailiili a tusitala le filemu o tapenaga a le vaega faaupufai o le faigapalota.
Faiga Faavae
E fā vaega tetele ua faailoa e Palusalue o le a taulai i ai taiala a lana vaega faaupufai mo le finauina o se manumalo i le faigapalota o le 2016.
O le atinaeina o le soifuaga lautele o tagata ina ia maua avanoa tutusa mo faamanuiaga – Tulafono ma le Faamasinoga, ma le Tamaoaiga ma le Siosiomaga.
O nisi o fuafuaga mo le soifua manuia o tagata lautele ua faaalia ai e le taitai le afioga Palusalue Faapo II, o le a vaai fua le fanauiti mai le pepe e oo i le lima tausaga ma tala fua a latou vai ma fualaau.
O le a siitia foi le penisione a tagata matutua i le selau pasene ma faatu se polokalame inisiua poo le Medicare Insurance e fesoasoani i togafitiga faafomai o tagata uma.
O loo fuafua foi le Tautua Samoa e faatu se vaega fou e nafa ma le faatupeina o aoga mo fanau uma a le atunuu mai lava i le tulagalua, e oo i aoga maualuluga ma le iunivesite.
O le fuafuaga lenei o loo fuafua ona o lea o le a mae‘a le fesoasoani a Niu Sila ma Ausetalia o loo totogi ai pili o fanau i aoga tulagalua ma aoga maualuluga. E lē o ni fuafuaga laiti pe a fua i le tau e faatupe ai peitai e lē o mafai ona faailoa le atoaga o nei fuafuaga i lona tulaga auiliili e pei o le faatupeina, ma le fesili pe faapefea ona faatupe.
O se fesili na tuusa‘o i le taitai pe o lona uiga o le a silasila le Tautua Samoa e siitia lafoga totogi e faatupe ai nei fuafuaga, ae na tali mai le Minisita agai o Tupe le afioga Afualo Dr Woods Salele e leai. O lana saunoaga i tusitala o loo silasila le latou vaega faaupufai i le aveesea o nisi lafoga totogi.
O se tasi o fuafuaga ua faailoa e le Tautua Samoa o le a latou faatino pe afai e manumalo, o le taofia uma lea o galuega faakonekakarate i le Aso Sa se‘i vaganā galuega o loo manaomia ai le auaunaga masani e tagata i aso uma ma taimi uma.
O le saunoaga a Palusalue e tatau i le Malo ona galulue faatasi ma le Fono a Ekalesia Soofaatasi i le tausisia o aoaoga faakerisiano e aofia ai ma le faamamalu o le Aso Sapati.
Peitai e pei ona silafia e iai isi tapuaiga e ese aso o le latou sapati ma o le fesili pe ua tatau ai foi i le Fono a Ekalesia ona faamamalu ma le Aso Sapati o lea ekalesia. E lē o auiliili mai le finagalo o Palusalue i lea tulaga.
