Ole amataga ole masina o Aukuso ole tausaga nei tusa lea ua toe tolu masina oloo totoe nei ona faamuta loa lea o galuega ale kamupani ole Yazaki Samoa i Vaitele e pei ona sa muai faailoa ele pulega aoao o lea kamupani ile tausaga ua mavae.
Ua faaalia ele taitai ole Malo le afioga ile Palemia susuga Tuilaepa Lupesoliai Sailele Malielegaoi ile faatalanoaga masani i luga ole leitio ale Malo ua logoina o ia ile aso e faatino ai lea fuafuaga.
Peitai, ina ua fesiligia le alii pule ole Yazaki le Susuga ia Funefeai Oliva Vaai, mo se faamaoniaga ole aso tonu o Aukuso e tapunia ai le kamupani, na taua ele Funefeai, e lei logoina tagata faigaluega ole kamupani ole Yazaki ile taimi e faamuta ai a latou galuega ma tapunia loa faitotoa ole kamupani.
Na faaalia ele alii pule e lei mautu se aso tonu o lea fuafuaga ona oloo faagasolo pea le gaosiga o uaea taavale mo oka a kamupani oloo iai.
Peitai ua faaalia ele afioga ile Palemia susuga Tuilaepa Lupesoliai Sailele Malielegaoi, ole kamupani na logoina o ia ile taimi e faamuta ai aloaia ai ana galuega.
Ole 700 tagata faigaluega sa iai ile tausaga ua mavae o lea ua faaitiitia ile 670 ona ua faamavae nisi ole au faigaluega.
Oloo faagasolo le totogiina ele Yazaki o aoaoga mo tagata faigaluega mo le toe maua o nisi galuega e agai iai pe a motusia galuega ale kamupani. O ia galuega e aofia ai ave taavale ma e 140 laisene ave taavale ua maea ona tuuina atu ele pulega o feoaiga i luga ole laueleele e aofia ai ma ave loli.
O lona uiga oi latou ia ole a galulue ave taavale pe a tuua le Yazaki. O isi oloo aoaoina i tomai tau komipiuta, tausi tusi poo le accounting, galuega faafailautusi, galuega i totonu ole atinae o tagata tafafao, eleiina o ie, ma galuega tau fai faatoaga.
Ole faaaogaina o fale oloo iai nei le Yazaki e tele talosaga ua oo atu ile Malo mai pisinisi ma kamupani latou te fia faaaoga e aofia ai se kamupani i Niu Sila e gaosia uaea mo pusaaisa ma masini ea malulu faapea foi se isi kamupani i Niu Sila e pulea ma umia e ni tamafanau a Samoa oloo latou gaosia moega ma faamalu.
Oloo faagasolo pea galuega ale komiti filifilia ua tuu iai tapenaga mo lea fuafuaga faapea ai ma fesoasoani e tuuina atu mo tagata faigaluega ale Yazaki ole a motusia le auaunaga ma muta ai faamanuiaga tau tupe i totogi mo le toe maua o nisi galuega e faaauau ai le tautua.
Ole masina lenei o Me e atoa iai le 26 tausaga talu ona faatuina le Yazaki i totonu o Samoa.
