Faailoa atili auaunaga a KlickEx i le motu i Saute

O le sini autu o le kamupani a le KlickEx e fia fesoasoani i le lafoina o tupe e faaaogā ai fesootaiga i upega tafailagi, ina ia mautinoa ua malamalama uma le mamalu o le atunuu o loo alala i soo se vaega o Niu Sila, i le tāua ma le faamāmā avega o le latou auaunaga o loo latou faia pe a fia lafo ni seleni i uo ma aiga.

O le ala lea na a‘e ai se tofa i sui o le KlickEx o loo faaulu i ai le latou ofisa i Aukilani, le afioga Faumuina Kelly Toleafoa ma le faletua i Gretel Toleafoa, faatasi ai ma se galuega soosootau‘au ma le afioga i le matua o usoalii, Afamasaga Pavihi ma le fetalaiga ia Matā‘afa faapea le mamalu o le latou laulau a fono a le Fonofaufautua ma sui mai Invercargill, ina ia faatulaga se aso faapitoa e oo atu ai sui o le KlickEx e faamalamalama lelei a latou auaunaga i le mamalu o Samoa o loo iai i lea itu o le motu i Saute o Niu Sila.

E iai la le feiloaiga lea sa faia i le faaiuga o le vaiaso na tea nei i Dunedin a sui o le kamupani a le KlickEx, afioga Faumuina ma le faletua ia Gretel, faatasi ma le mamalu o le atunuu sa auai i lea aso, ona o le fia silafiaina o le auaunaga a lea foi kamupani i le itu tau i le lafoina o tupe.

O loo faasolosolo pea la lenei faalauiloaga a le KlickEx, e pei ona agai atu ai i le vaiaso nei i Kalaiesetete, ona sosoo ai lea ma Nelson pe a tusa ai lava ma fuafuaga uma e pei ona faatulaga ai. O le sini autu o lenei kamupani, ia fesoasoani e faasino i tagata kamupani eseese o loo faigofie ona lafo ai tupe, o kamupani o loo maulalo a latou tau totogi e lafo ai tupe, ina ia maua e tagata se fesoasoani ma se faamāmā avega pe a lafo seleni i aiga i Samoa faapea foi isi motu o le Pasefika ma mea uma lava o loo mafai ona oo atu i ai a latou auaunaga lafo tupe. Ia mafai ona lafo se seleni ae itiiti se tupe e totogi ai le lafoina o lena tupe.

Ua avea nei la le ofisa o le Fonofaufautua a Samoa i Dunedin ma paaga a le KlickEx e lafoina ai seleni a le mamalu o le atunuu o loo alala ma papaaao i lea itu o le motu.

O le afioga i le matua o usoalii Afamasaga Pavihi faapea le fetalaiga ia Matā‘afa aemaise le Peresetene le afioga a Toleafoa ma le laulau a fono sa latou taliaina ma le fiafia lenei faigapaaga.
O le tau e lafo ai ($7) ma le vave o le taunuu i telefoni feaveai a le Digicel i Samoa ua tonu ai loa le manatu a le faalapotopotoga e faia se faigapaaga ma le KlickEx e faaaogāina ai le auaunaga.

E fai o le siisii i luga o le soifuaga ae toe alualu i luga ma le lafoina o seleni. Mo le fia faaaogāina o lenei auaunaga valaau ane le ofisa o le Fonofaufautua i Dunedin 027 843 3909 poo le 021 150 8618 i le tuatusi 96 King Edward Street.
Afioga Faumuina Kelly & Gretel Toleafoa ma le mamalu o Samoa i Dunedin sa auai atu i le faaiuga o le vaiaso talu ai mo le fia malamalama i auaunaga a le KlickEx

Laulau a fono a le Fonofaufautua a le aai o Dunedin, taitaia e le afioga  i le matua o usoalii, Afamasaga Pavihi (laei paepae laina i luma), faatasi ai ma le sui mai  Invercargill susuga Masagaave, faatasi ma le sui o le KlickEx, afioga Faumuina Kelly Toleafoa