Faaiila pea le ponesi e atinae ai le niu ma le koko

O le maota o Pulenuu ile eleele fou na tufa ai tupe o le ponesi, lea ua maua muamua le ta‘i afe tala
O le maota o Pulenuu ile eleele fou na tufa ai tupe o le ponesi, lea ua maua muamua le ta‘i afe tala

 

O le tausaga e 2010 na toe aapa ai le Malo e faatino le polokalame o le ponesi e totogi atu i faifaatoaga ina ia toe atinae le niu ma le koko faapea isi laau tau faatoaga. Ua savalia ai nei tausaga e ono o faia pea le polokalame lenei sa mafua ona faataatia e lei toe faia, ona ua iai faaletonu na aliali mai ai ile faagaioiga o le totogiina o le ponesi.

O le ivitu lea o le tamaoaiga o Samoa i tausaga ua mavae o faatoaga, peitai e lē o toe tutusa aso na ma aso nei ona ua maualalo lava fua o faatoaga e ave i maketi i fafo. O le popo ma le koko e moni o loo iai nisi o maketi ua ave i ai, ae e lē o toe maua aso ua mavae sa fai fale koko e tao ai ma faatau i fafo. Ua ese foi gaioiga a pisinisi i nei ona po ua faatino ai le aveina i fafo o ia laau tau faatoaga.

Ua oo mai i lenei vaitau ua ave koko ua tu‘i malu, faapea koko ua mamago lelei ma faatau i maketi i Niu Sila ma Ausetalia. E lē gata o le koko malū mo le faaaogāina e o tatou lava tagata ae o le koko mago lea ua toe manaomia mai e ni kamupani i Niu Sila mo le gaosiga o le sukalati.

O le popo e lē o maualuga lava se tulaga o iai ile auina i fafo se‘i vaganā le peepee ma le suauu popo o loo lelei lona maketi ile taimi nei. O le tasi o naunautaiga o le Malo ia faateleina pea nei laau tau faatoaga e tua i ai le atunuu.

O le ponesi o le koko ma le niu ua silia ile lima selau faifaatoaga ua lesitala ai. O le vaiaso ua mavae e to‘a 53 isi faifaatoaga e fou ile polokalame ua atoa le tausaga o faafailele a latou niu ma koko ma isi laau tau faatoaga ma ua fao taga nei le ta‘i afe tala. E sosoo ai ma isi vaega tupe e totogi auauai i ai i totonu o le fā tausaga lea e maua ai e le faifaatoaga e toatasi le aofaiga atoa o le seleni o le ponesi e fā afe tala. O le feau tau molimoli a le Minisita o Faatoaga ma Faiga Faiva, le susuga Laauli Leuatea Polataivao Schmidt ia faamaoni ile polokalame auā e leai lava nisi e selesele ile lelei o nei polokalame o faifaatoaga lava e luu tupe ai.

O le talitonuga o le minisita a mae‘a tausaga o le polokalame ma fua mai niu ma koko ma isi laau faatoaga, e lē tau fesiligia o le a maua ai e le aufaifaatoaga ua lesitala ile polokalame o le ponesi ni faamanuiaga lelei.