Faaigoa le potu ia MEALAMU

Na faafeiloai aloaia e le tamaitai taitaifono o le Mangere-Otahuhu Local Board , le Afioga Lemauga Lydia Sosene, le Susuga Nick Bakulich o ia foi o se sui o le Mangere-Otahuhu Local Board, faapea le aufaigaluega sinia a le faletusi, le susuga i le alii taalo o le Olopeleki, Susuga Kevin Mealamu ma lona aiga, i le tatalaina aloaia o le TOIA multi-use facility i Otahuhu.

O lea nofoaga fou mo soo se faamoemoe i le pitonuu o Otahuhu, le TOIA multi-use facility, o loo faatulaga ai ma se faletusi e fā ona potu tetele, ma o nei potu ua faia i ai le filifiliga a le Komiti Faafoe ina ia faaigoa i suafa o nisi ua iloga o latou sao i totonu o le komiuniti.

Ma o se tasi o na potu ua faasuafaina i le alii ta‘uta‘ua o le Olopeleki, ae o se alo o Samoa, le susuga ia Kevin Mealamu. Ma ua faaigoa ai lena potu o MEALAMU; o se faaeaea e amanaia ai le sao tele o lenei alo o le atunuu e lē gata mo lona pitonuu o Otahuhu ae faapea foi mo le atunuu atoa o Niu Sila, tainane lona tauaveina foi o le suafa o se tamafanau a Samoa, lea e avea ma mitamitaga i soo se Samoa o loo aumau i Niu Sila nei.

O le ala tonu lea na a‘e ai se tofa i le taitaifono ma le Komiti Faafoe a le Pulega o Faigamalo Laiti a Mangere-Otahuhu, e faaigoa le potu ia MEALAMU, ona o mea lelei ma le mataina ua ausia e lenei taulealea i lona soifua taalo aemaise o lona sao tele sa auai ai i meafai i totonu o le komiuniti e pei ona folasia atu i lalo:

  E iai ona ata i tusifaitau a tamaiti, ma o loo avea i le taimi nei ma Amepasa a le vaega o le Barfoot and Thompson mo le falemai o tamaiti le Starship

  Na iai taimi na ia kapeteniina le All Blacks ma le Auckland Blues

  Ausia taaloga e 100 mo le All Blacks

  Na taalo i test games e 100 na manumalo ai le All Blacks

   Se uluai tama ua tatalo i taaloga e 150 a le Super games mo se kalapu lakapi e tasi

   Lauiloa i lona igoa o le ‘Otahuhu Nugget’

Susuga Nick Bakulich (sui o le Komiti Faafoe) Kevin Mealamu, Mrs Latai Mealamu & Lemauga Lydia Sosene (taitaifono o le Komiti Faafoe)