Faagasolo suega ulufale mo le Kolisi o Samoa & Kolisi o Avele

E faitau selau le aofai o fanau o le Vasega 8 (Year 8) ua mae‘a le faatautaiga o le suega ulufale mo le Kolisi o Samoa i le faaiuga o le vaiaso na tea nei. O le amataga o le vaiaso lenei e faagasolo ai le suega lona lua. O se suiga tele lea ua iai nei le faagasologa o aoaoga aemaise o le agai atu o le fanau sa i aoga tulagalua mo Kolisi maualuluga i totonu o le atunuu.
O le Kolisi o Avele lea na faatautaia ana suega ulufale i le aso ananafi ma o le toatele lava o le fanau sa sue i le suega mo le Kolisi o Samoa ia na sue foi i le fia maua o avanoa o le Vasega 9 (Year 9) i Avele.

E na o le pau ia o Kolisi o le talafatai o le taulaga ua faatautaia ana suega ulufale ae o loo avanoa le Kolisi o Leifiifi mo le faaulufale i ai o fanau i le tausaga fou pe a lē maua ni avanoa i suega ulufale nei. O le toatele o fanau na sue i le faaiuga o le vaiaso na tea nei ma le amataga o le vaiaso lenei o fanau e aooga i aoga a le Malo, aoga a Ekalesia ma aoga tuma‘oti ua saili avanoa mo le isi laasaga lea o le ola aoaoina.

O le tausaga muamua lea ua faatino ai suega ulufale nei ma o le unai a le Matagaluega o Aoga e pei ona ta‘ua e le Ofisa Sili, Matafeo Falanaipupu Tanielu Aiafi, o le aumai uma o le aotelega o le ola aoaoina o le fanau i le tausaga atoa lea e Vasega 8 ai ma tuufaatasi ma faaiuga o suega ulufale nei ona filifili loa lea poo ai e agai i aoga maualuluga nei i le taulaga.

Faaalia e Matafeo o taimi ua tuanai e tele lava ina faamanuiaina le fanau e lelei i le suega lea e tasi i le faaiuga o le tausaga ae e lē o lelei lona lipoti mai i le faagasologa o le tausaga atoa ma o le avanoa la lenei e ave ai i le toatele o fanau e faamaoni lava ia latou meaaoga i le tausaga atoa ae e faaletonu lava i suega faaiu ia o le tausaga.

O lea foi e unai lava le agai o fanau i aoga maualuluga poo kolisi i totonu o o latou lava itumalo ma ua tele lava aoga ua ta‘u Kolisi auā ua faaopoopo i ai le Vasega 13 e mafai ona sue sa‘o mai ai fanau i le motu tele i Salafai atoa nuu i tua auā le vasega faaolioli o le Iunivesite le UPY.

O le mau a le Malo e tāua tele nei suiga ona ua tele faafitauli ua tulai mai i fanau ua leai se fesootaiga ma se mafutaga ma mātua ma aiga ona o le agai ese mai i lea mafutaga ae nonofo i le taulaga auā aoaoga nei, ma o le unai la lea ia mafai e fanau ona faaauau aoaoga i vasega maualuluga e aunoa ma le tau tuua o aiga aemaise mātua ma le puipuiga ua masani ai.
O le a maua i se taimi o le vaiaso fou le faaiuga o suega nei a le fanau ma e faasalalau i luga o le TVOne ma leitio i le atunuu.