Faagasolo le Biggest Loser – faatāua le soifua maloloina

O le vaiaso lenei e amata ai loa ona aveese taitasi le toa sefulu (10) o alii ma tamaitai ua ofi nei i le tauvaga muamua lenei a le TVOne – O i latou nei ua tausinio e saili ai le tagata aupito tele ona pauna e pa‘ū ma faagasolo taumafa tatau auā le soifua maloloina.

O le amataga o le tausaga na amata ona talanoaina ai e le pulega a le TVOne se polokalame faapea aua ua toatele le atunuu ua maua i le tino puta ma ua mafua ai le tele o gasegase le pipisi i le atunuu.
Ua tele foi polokalame ia ua faagasolo auā faamalositino ua ofo atu i le atunuu auā lava lenei taulai a le Soifua Maloloina atoa ai le lautele o le atunuu ina ia mafai ona tuuitiitia nei faamai ua na o le maliliu ai o tagata o le atunuu.

O lea la ua mae‘a le pisi o le SIDS na feagai ai ma le ofisa faasalalau ua amata ai loa lenei tauvaga. Sa toatele lava na taumafai e ofi mai i le tauvaga lenei peitai na mae‘a vaiaso o le filifiliga a le vaega o le soifua maloloina, o le alii o loo faatautaia le tauvaga, Muliagatele Brian Lima, faapea ai ma nisi o faiaoga i faamalositino ua o latou galulue faatasi faapea ai le vaega o taumafa tatau a le Soifua Maloloina, ona filifilli loa lea o le to‘a10 ia ua pue nei a latou polokalame faamalositino atoa ai ma taumafa ua fautuaina e taumamafa ai ma faaitiitia ai le tino puta.

O le toatele lava e pei ona faatalatalanoaina o le agai mai i lenei tauvaga ona o lea sa taumafai muamua i isi lu‘i peitai sa fai faatasi lava ma tagata ua masani i le faamalositino ma na alu alu lava fati le toatele ma o le avanoa lenei e tolu masina lea ua mafai ai ona galulue faatasi tagata e lapopoa ma ua malamalama le isi i le isi i le faigata o le tuu ifo i lalo o pauna ma le suiga o taumafataga i lea aso ma lea aso.

O le taumafa lava ma le laitiiti o le faamalositino lea ua ioe le au tauva e mafua ai le tino puta ma o le taumafaiga lava ina ia mafai ona maua le soifua maloloina i se taimi umi a o faasolosolo ai foi ina matutua le olaga.

Na amata i le vaiaso na tea nei ona faasalalau i luga o le televise lenei taumafaiga ma ua toatele i latou ua maua i le tino puta ua tavili atu mo ni avanoa i le televise peitai ua na o le pau ia o tagata ua mafai ona faatino ai le polokalame i lenei uluai vaega ma le faamoemoe o le a faaauau i tausaga uma.

O le faiaoga le afioga Muliagatele Brian Lima o se tasi ua silafia e le atunuu i lona sao i le taaloga o le lakapi ma o lana polokalame faamalositino lea e ta‘ua o le Boot Camp ua toatele le atunuu ua agai i ai ma e ta‘ua lava e nisi e faigata tele e lē faigofie ma o lea foi ua iai le suiga o ana taumafaiga mo le polokalame lava lenei ona o le manaoga ina ia fai fuafua i le lapopoa o le au tauva o le Biggest Loser.

Ae na molimauina le toatele ua agai nei e molimauina ma ave le faamalosi i le mamalu ua tausinio nei auā le polokalame muamua lenei o le Biggest Loser.

O le vaiaso la lenei ua sauni ai poo ai o le a alu ese mai i le polokalame, ae o le a faaauau pea ona toleni i le fale toleni a Muliagatele seia oo lava ina mae‘a le tauvaga ma toe taumafai ai e siaki le pa‘ū i lalo ua iai o o latou pauna.

E toafā lea e filifili i ai le sailiga o le tagata e manumalo i le iuga o lenei polokalame ma o le a faapea foi ona maua se tinoitupe e $3,000 mo lē e aupito tele pauna e aveese mai i lenei polokalame.
O isi e mau faailoga foi ma e silia i le $10,000 ua faaalu e le TVONE i faailoga mo nei alii ma tamaitai.
E iai lava le fomai e latalata ane i taimi uma

E mautinoa lava le faigata o le tauvaga

Le tatalaina aloaia o le polokalame