E fai o totonu o Samoa lava ia ae o le Pasefika ma Malo Aufaatasi ua faalauiloa uma a latou fesoasonai mo le taligamalo a Samoa i le masina o Aukuso agai atu i le masina o Setema o le tausaga nei i le fono lona tolu a atunuu laiti tau atiae a le lalolagi lea e faapuupuu i le gagana Peretania, o le SIDS. Ua amata ona pepese ai le toatele i le fono ma e lē laitiiti taumafaiga a le malo ma tagatānuu o Sammoa i le taligamalo lenei. Ua fai faatasi foi ma le faamanatu ai o le vaiaso o le Teuila i lenei tausaga ma e mautinoa le tele o polokalame o le a faatulaga auā lenei taligamalo tele.
O lea ua toe taliu mai le taitai o le malo le alii Palemia i se fono na faia i Niu Ioka i Amerika, e faatulaga ai sauniuniga a Samoa i lenei fono tele. O le fesoasoani a Malo Aufaatasi o le faatupe lea o le malaga mai i Samoa o le toatele ia o le a nonofo i le atunuu mo le lua vaiaso o lea fono. E lē gata i lea o le totogi o potu o faletalimalo o le a nonofo ai. E oo i le tausiga o nei tagata o le a agai Malo Aufaatasi e totogi uma.
O lea foi ua iai se komiti na tofia i le faaiuga o le vaiaso i Fiti mo atumotu o le Pasefika ia o le a iai ona sui i le fesoasoani ai ia Samoa i ana sauniuniga. Ua mae‘a le faalauiloa o le fesoasoani a le malo o Iapani e ala lea i ni taavale e aofia ai pasi faamalū mo le feaveaiga o sui usufono i soo se itu o le atunuu e moomia le agai i ai i taimi o le fono. E $15 miliona tala Amerika le tau atoa o lea fesoasoani e pei ona faaauala mai i le alii Minisita o Tupe, le Afioga Faumuina Tiatia Liuga. O lea foi ua agai le Faalapotopotoga o le Siosiomaga a le Pasefika, le SPREP, i ana galuega amata o lana foi fesoasoani ia Samoa, lea o le a asiasia uma ai faletalimalo o le talafatai o le taulaga atoa ai fale‘aiga ma nofoaga o le a faatautaia ai fonotaga, ina ia siaki ma faamautu le lelei e tatau ona iai le galuega e faaitiitia ai le otaota lafoai i lea vaitau o le fonotaga.
O se faafitauli tele pe a lē mafai ona fai lelei le otaota o le a faaputu e le faitau afe o tagata o le a i Samoa i lea vaitaimi o le tausaga, aemaise o lea e usuia le fono i le vaitaimi e tumutumu ai foi Samoa mo le faaaliga o tu ma aganuu e ala i le vaiaso o le Teuila. Ua tatala fesootaiga a le tupulaga talavou e ala i upega tafailagi mo le latou foi sao i lenei fono tele o le a talanoaina ai le tele o mataupu e aafia ai le tamaoaiga ma le siosiomaga o malo laiti tau atiae aemaise o le faamautu ai o le va galulue faatasi ma malo tetele o le lalolagi ina ia mafai e malo laiti ona tali atu i suiga ogaoga o le tau ma suiga o tamaoaiga lautele o le lalolagi. Mo nuu ma afioaga, o le galuega ua unai o le faamamā o le atunuu ma ia taumafai e faaali le uiga talimalo o Samoa ua masani ai e pei ona talosagaina ai e le Malo alii ma faipule, sa‘oao ma tamaitai aemaise o le malosi o le nuu.
