Ua mae‘a le faigapalota laititi mo le itumalo palota a Maori o Te Tai Tokerau ma ua toe manumalo le alii o Hone Harawira lea na faamavae mai le vaega faaupufai a Maori ae faatu lana pati fou o le Mana Party. E ui ina manumalo le alii o Hone ae ua maitauina le afaina o fuainumera o le aofai o lana palota na manumalo ai pe a faatusatusa i lana manumalo muamua i le faigapalota faalauaitele ia Novema 2008.
O le faaiuga o le faigapalota o le Aso Toonai, 25 o Iuni, e 5611 palota a Hone Harawira, ae 4744 palota a le sui a le Leipa, le alii o Kelvin Davis, ae na o le 1026 palota a le sui a le Maori Party, ma e 11,606 le aofai o tagata na faatino o latou palota i lea faigapalota. Afai e faatusatusa i le faaiuga o le faigapalota o le tausaga 2008, e 12,019 palota a Hone Harawira na maua, ae 5,711 le aofai o palota a Kelvin Davis, ma o le aofai o palota na faatino i lea tausaga e 20,455. O lenei faatusatusaga o loo manino ai le tele o le eseesega o fuainumera o le tausaga 2008 ma le faaiuga ua iai nei i lea itumalo.
O le manatu a le sui a le Leipa o Kelvin Davis, o lea ua faaauau pea ana
galuega mo le tauvaga o loo loma nei i le aso 26 o Novema i le faigapalota faalauaitele a Niu Sila mo lenei tausaga.
O le upu moni lava lea ua saunoa i ai le alii o Kelvin Davis aua o lenei ua tulimatai uma e vaega faaupufai o le Palemene a Niu Sila le faigapalota faalauaitele lea ua atofaina mo le aso 26 o Novema 2011. O le saunoaga foi lava lea a le alii o John Key ina ua taufaaofi mai lana tala o le tupe mo lenei tausaga – o lenei o le a lafo ia Niu Sila atoa poo fea o iai so latou finagalo i lana faigamalo. Ma o le talitonuga a John Key ma lana faigamalo e toe tofi mai lava latou e le atunuu e tauaveina le faigamalo a Niu Sila – ma ua ia faataoto mai le tele o mea ua fuafuaina e toe suia pe afai e toe pale mai i le tofi Palemia.
O le tele o suiga ua fuafua nei e John Key mo Niu Sila pe afai e toe tulai mai – ua talitonu le vaega a le Leipa e matua afaina ai le toatele o tagata faigaluega a Niu Sila, aua o loo ave lava le faamuamua a John Key ma lana faigamalo i le aufaipisinisi tetele.
O lenei la ua faasavali la‘u lava galuega o le taumafai e faamanino atili le anoano o mataupu a le faigamalo, ma mataupu tau polokiki mo le faalauaiteleina o le silafia o le tatou atunuu.
O le autu lava o lenei galuega ina ia nofo malamalama le tatou atunuu i mataupu o loo aafia ai nei le toatele o o tatou aiga, ma ia maua e Samoa uma le agaga o le finau mo le manuia o tagata lautele, e auala lea i le faatinoina o a latou palota i le aso 26 o Novema. Ua mae‘a lava ni feiloaiga matagofie ma nisi foi o faalapotopotoga ma ekalesia i Magele, ma o lenei ua faagasolo loa ia Niu Sila atoa, ma e faigofie lea i le tatou lava gagana.
O le Aso Toonai sa matou feiloai ai ma le susuga i faafeagaiga ma o latou faletua ma le ekalesia AOG i Te Puke, ae o le Aso Gafua o lenei vaiaso o loo sosoo ai ma feiloaiga foi ma nisi o faalapotopotoga i le aai tele lea o Palmerston North. E mae‘a Palmerston North, ona sosoo lea ma feiloaiga ua
fuafuaina mo Hamilton.
Afai e mae‘a nei feiloaiga o le a faapena lava ona faaauau pea i Ueligitone ma faagasolo atu ai seia oo atu i Dunedin, Timaru ma Invercargill, poo fea lava se pitonuu o Niu Sila o loo fia maua se faamalamalamaga o mataupu polokiki, ma mataupu lautele aua le agai i luma o le tatou atunuu i Niu Sila nei – e tele lava le avanoa ou te oo atu ai pe a faafesootai mai le matou ofisa.
E taua tele nei feiloaiga ona o lenei ua fuafua le vaega a le Leipa e faalauaitele ni faiga faavae i masina o i luma o le a tau ai ma le aufaipisinisi tetele e pei o faletupe, faapea foi i latou o loo pulea kamupani inisiua, ma pule o kamupani tetele o le Farmers Federation, ma kamupani tetele faavaomalo mai Ausetalia, Amerika ma Europa, aua o le tele o nei kamupani o loo maua a latou tupe ma ave i o latou atunuu le tele o a latou polofiti.
O lenei taua e matua manaomia ai le fesoasoani a tagata lautele. E taua le silafia muamua o mataupu ma mafuaaga ua tulai mai ai le tele o faafitauli i le maualuga o le tau o le soifuaga ma le maualuga o le fuainumera o tagata ua leai ni galuega, aemaise le maualuga o le aitalafu a le Malo ua iai nei.
O lona lua e taua le auai o o tatou tagata i le faatinoga o a latou palota I le aso 26 o Novema, aua e ui e tele tupe a le vaega a le National ma latou paaga, ae pito i sili ona toatele le fuainumera o tagata lautele e masani ona lagolago i le vaega a le Leipa, pe afai lea e faatino a latou palota.
O tagata lava e pito i sili ona manaomia le fesoasoani i mea tau fale a le Malo, faapea penefiti pe a leai ni galuega, poo penisone, poo aoga a le fanau, o Maori ma tagata Pasefika – peitai ane o latou foi nei e pito i sili ona faatamala i le faatinoga o a latou palota. Silasila i le faaiuga o le faigapalota i le itumalo o Te Tai Tokerau – na o le 11,606 i latou na palota i le Aso Toonai i le faigapalota laitiiti. I le tausaga 2008 e 20,163 le aofai o i latou na faatino a latou palota, a o le aofai lava o tagata ua mae‘a ona resitala mo lenei itumalo e 33,060.
O lona uiga e toatele naua i latou e le o faatino latou palota, a o latou tonu ia o loo manaomia le fesoasoani mai le Malo, lea ua fulitua i ai le vaega a le National.
E toatele e le o faataua a latou palota, ae o latou foi nei o loo manaomia tele le fesoasoani – ma e masani ona maua lea fesoasoani mai le vaega a le Leipa.
