O lea ua amata ma faagasolo i le vaiaso lenei se aoaoga faapitoa ua faatautaia e le Vaega o loo nafa ma i latou sa pagota i atunuu mamao ae ua toe foi mai mo le toe fuataina i Samoa nei.
O i latou nei ua taulai i ai le aoaoga faapitoa lenei e aoaoina ai ma saga unai le taofiga o sauaga i totonu o aiga i Samoa nei. O le faamoemoe ina ia aoao atu ia i latou nei ona agai lea e faasoa ia latou polokalame faalauiloa ma le toe fuataina le aogā o nei aoaoga ua o latou maua.
Ua faatupe e le Faalapotopotoga e unaia aoaoga, tu ma aganuu aemaise le tomai faasaienisi a Malo Aufaatasi le UNESCO lenei polokalame e pei ona faatupe ai le faagasologa o aoaoga ma faalauiloa e mulimuli mai ai.
O le alii ofisa sili o lea polokalame ia Vernon McKenzie ua ia ta‘ua le taumafai e iai se sao o lenei faalapotopotoga e ala i ana asiasiga ma galuega faufautua le tāua o le taumafaiga tele lenei a le atunuu ina ia taofia le faatuputupulaia pea o le numera o i latou ua aafia ona o sauaga i totonu o aiga.
O le autu o le faamoemoe lenei i lenei tausaga ua ta‘ua, a saogalemu le alii e saogalemu foi aiga ma o le faatāua lea ua ave i lenei galuega tele.
O le fale faamasino i Mulinuu lea e faatautaia ai lenei aoaoga i lenei vaiaso ma o le alii Palemia na saunoa e tatala aloaia lenei faamoemoe e pei ona ia faaalia ai le tulai mai pea o lenei faafitauli e ui i le tele o taumafaiga i le atunuu ina ia tau taofiofia ai.
O lana faafetai i le UNESCO ona o le amanaia o le galuega ua faia e nei foi sui o le atunuu o i latou ua foi mai i solitulafono i fafo ua vaai foi i le faigata o lenei tulaga ma ua faapea ona taumafai e toe foi mai i Samoa ma fai se sao auā le mautinoa e saogalemu Samoa i le agai i luma.
O le faalapotopotoga lenei ua faapea ona faatuina i lalo o le faamalumaluga a le Ofisa o le Loia Sili ma o alii ua i totonu o lenei polokalame e eseese lava atunuu na tuli ai faasalaga o soligatulafono na molia ma faamaonia faasaga ia i latou.
E tele lava foi ni finagalo na faaalia i le toe foi mai ai o i latou nei ma foliga mai ua ave i ai le faamuamua pe a faatusatusa i pagota i Samoa nei peitai o lea ua vaaia le tele o polokalame toe fuataina ua o latou faatautaia i aoga aemaise isi faalapotopotoga eseese i totonu o le atunuu aemaise lava foi i toese i Samoa ma o le faasoa mai o i latou nei ua manino le fesoasoani i tupulaga talavou ua amata ona agai i soligatulafono ma ua taofia i le feiloai ai ma nei sui o le atunuu.
O le vaiaso atoa la lenei o le a talanoa auala e mafai ona fesoasoani ai nei alii e unai le saogalemu o tamaitai ma fanau teine i totonu o aiga ia o loo tele ina lipotia mai ai sauaga ua faia faasaga ia i latou.
