“Faafetai i le aufaigaluega uma a le Malo sa fitaituga ma punoua‘i mai lava i Faauluuluga e oo i sē o pito faatauvaa. Ua outou lē manatu i tou itu taulagi poo mamalu faalagia o tofiga, ae ua outou “ai palapala” ina ia to manū mo Samoa le atunuu pele na ia totofi tatou uma, oe ma a‘u e tautua ia lē pōnā ona o se galuega ua lē atoatoa”..Tuila’epa
O le tala ‘ave i le lalolagi ina ua mae‘a le fono a atunuu laiti tauatiae, e maeu le taligamalo a Samoa. Amata mai ina ua taunuu i le malaevaalele e oo mai i le taulaga ma agai atu i faletalimalo sa faamautu ai seia oo i le nofoaga o le fonotaga.
E leai se mea na sasi i le silasila ma le vaai a usugafono ma le 4,500 o tagata sa lesitala mo le fia auai. O se ata manino o le lagolago a pulega mamalu a nuu ma afioaga ma tagata uma, i le faaali o le mea silisili ma ia aua ne‘i iai se mea e gase auā o le lalolagi ua ulufale i le atunuu.
O lagona ia o soo se Samoa ina ua amata ona faagasolo le taligamalo, auā o le molimau lava ia i tapenaga a nuu ma afioaga e leai se isi na alo tamala i le faamamā o lumāmaota ma lumālaoa aemaise o teuga felanulanuai i le alatele, ma moli i le po, a o le laufofoga fiafia o tagata uma.
O le tala moni, o le faatoa vaaia lea o se tulaga faapea i se talimalo a lo tatou Malo ma le atunuu ona o le taupati o tagata uma e faamaopoopo le finagalo o le Malo, e pei ona sa saunoa faalauaitele le Palemia susuga Tuilaepa L Sailele Malielegaoi a o lei amatalia le fonotaga na ave ai le tuualalo i le atunuu, ae faaopoopo i ai ma le saunoaga a le taitaifono o le fono a ekalesia soofaatasi le susuga Kasiano Leaupepe.
O le mae‘a o le taligamalo na toe malele ai le taitai o le Malo ma ia molimoli le faafetai i le atunuu ona o le agaga ua faagaeetia i mea uma sa vaaia ma molimauina, o se faailoga o le galulue faatasi o tagata aemaise i le aufaigaluega a le Malo.
O le molimau foi lea na vaaia i le taimi o le fonotaga o Pule sili ma Pule sili lagolago o le aufaigaluega sinia e oo ia i latou e maualalo o latou tulaga, e leai se isi na faatamala i le faatinoga o o latou tiute i le tautuaina o usugafono. O mea e fia maua, o le fia maua o se fesoasoani ia latou galuega ma le anoano o manaoga.
