Faafouina olaga o le ‘au fasitoalua

Ua lua nei tausaga o faia faauuga a le vasega o tama tane ua faitoalua, mai le polokalame a le Toomaga mo ē Puapuagatia, e mafua ona o faaiuga a le faamasinoga ona o moliaga o le fasiavā ma le saua i fanau.

O le polokalame a le Toomaga o loo faaaogā ai nisi o faifeau mai ekalesia eseese latou te tuuina atu fautuaga i nei tama tane ina ia mafai ona taofia ai le faaoolima i o latou taitoalua, ma fanau. Peitai na faailoa e le Ofisa sili o le Matagaluega o Faamasinoga i lana saunoaga autu i le faauuga o lenei tausaga, e iai se tasi o le vasega faauu o le 2015 na oo atu lona toalua ma faailoa atu na toe fasi foi e le tamaloa.

O le faanoanoaga lea o le Pule sili le tofa Masinalupe Tusipa Masinalupe, ona e ui e faapea o le toatele o le au faauu ua ausia se tulaga lelei ae o le lago mate e tasi ua faaleagaina ai le manogi o le suauu lelei.

O lona uiga ua avea le toatasi ma auala o le ta‘uleagaina o le faamoemoe atoa o le polokalame. Na tautino le Pule sili, e leai se isi e atoatoa e oo foi ia te ia, peitai o le tāua o polokalame a le faamasinoga ia mafai ona taofia ai.

O le faatuina o le faamasinoga mo mataupu tau aiga poo le Family Court, o se isi lea o ana pitolaau o le galulue faatasi ma le Toomaga mo ē Puapuagatia, lea ua ave i ai i latou e molia i ni solitulafono e mafua mai i totonu o le lotoifale o aiga.

O le toatele lava o i latou o loo molia o le itupa o tamaloloa ua fai toalua. O le tausaga ua mavae sa faia ai le uluai faauuga mai lea polokalame. O le molimau a se tasi o tamaitai ofisa o le Toomaga e leai ma se isi o le vasega faauu lea ua toe molia i solitulafono na mafua ai ona tuuina atu i le polokalame.

Faaalia e le Peresetene o le Toomaga le tofa Siliniu Lina Chang, o le tasi lea o polokalame e sili ona tāua ia latou fuafuaga o le tausaga ona o le manaoga ia maua se aoaoga lelei mo le itupa o alii fai toalua ae ua aafia i le tulafono e mafai ona toe faafouina ai le mafutaga ma o latou taitoalua aemaise o le va ma fanau.

O nisi sa maua faailoga faapitoa ona o le maualuga o le tulaga ua ausia i le usitaia o tuutuuga a le faamasinoga ma ua lē toe aafia i solitulafono na mafua ai ona tutulai i le faamasinoga O nisi sa maua faailoga faapitoa ona o le maualuga o le tulaga ua ausia i le usitaia o tuutuuga a le faamasinoga ma ua lē toe aafia i solitulafono na mafua ai ona tutulai i le faamasinoga