E ese le matagofie o tapenaga ale ‘au faipepa o lenei faafouina sa faia ile Aso Toonai na tea nei, 25 o Fepuari. Ole ofisa ole NET (Naku Enei Tamariki) sa ofoina mai lo latou maota faapea ma le tausiga i taumafataga ma le faatinoga ole polokalame atoa ole faafouina.
Ole manulauti na autū iai le aso: “O agavaa/tomai o aiga”. Sa faasoa ai foi le sui mai le Ofisa o Aoga; Juliana Malaeulu e faalauiloa mai tulaga o iai le Ofisa ma mataupu e ao ona mataitu iai faiaoga o Aoga Amata.
Tele finagalo na saunoa iai faiaoga e tusa o la latou mātau i totonu o Aoga Amata ma le eseesega o iai ile taimi nei, ona ua lē faaaogāina malosi le gagana Samoa ae ua tele ina fenanui faiaoga i tamaiti. Sa ta‘ua foi le toatele o tamaiti mai isi atunuu ua faatonu atu i Aoga Amata Samoa ona ole fia iloa tautala ile gagana Samoa. Peitai ua avea le toatele o tamaiti mai isi atunuu ua tele ai le nanu ae itiiti ona faaaogā le gagana Samoa na ala ai ona faatū Aoga Amata.
Ina ua mae’a le taumafataga, na faasoa loa sui ole NET. O lenei ofisa e faapitoa a latou fesoasoani mo aiga e lē lelei le tamaoaiga faapea ma aiga o iai faafitauli ile lē auina ole fanauiti i Aoga Amata.
Tele finagalo na faaalia e uiga ile fesoasoani fai fua a lenei ofisa ole NET mo tagata Pasefika, Maori ma Palagi. Latou te fesoasoani e faasino aiga i Ofisa o fale pe afai ose nofoaga oloo manaomia, ave ile ofisa o tupe e faailoa ona paketi lelei ina ia aua ne‘i soona faaaogā sese le totogi ae fia ‘aai ai le fanauiti. Latou te ave foi meaai ma lavalava i aiga oloo lē lava ni meaai ma lavalava mo le fanau.
Ole itu tāua oloo ua vaavaalua nei le NET i Ueligitone ma le SAASIA ina ia fefaasoa‘i le lagolago mo le fanau i Aoga Amata.
Na filifili ai foi ma tofi ole lala i lea fonotaga ma ole iuga lenei ole palota:
Taitaifono: Le‘autuli‘ilagi Taotua M.F.Sauvao
Sui Taitaifono: Sadie Fiti
Failautusi: Maaola Tanuvasa
Sui Failautusi: Vevesi (malie ua lē maua le faaiu)
Teutupe: Sadie Fiti
Sui Teutupe: Maila Carter
Faatina o Ueligitone: Sina Samani
Sa faasolo atu le polokalame ole aso ile tufaina o tusipasi (Certificate of Attendance) mo i latou na auai i lea fonotaga faapea ma tusipasi o i latou na ile fonotaga sa faia ile Ofisa o Aoga ia Novema 2016, ona sa toese le faatina ia Fereni Ete e sainia nei tusipasi.
Ole faatina o SAASIA i Ueligitone le susuga ia Sina Samani na ia tauaaoina atu nei tusipasi i ē na auai, ae ole faatina ole SAASIA aoao le susuga ia Fereni Ete na ia sainia tusipasi e fai ma sui o Sala Tagoilelagi-Leota, le Taitaifono Aoao ole SAASIA.
Sa toatele faiaoga na faanoi ona ole aso foi lea ole Tofiga ale EFKS i Ueligitone. Peitai e lei taofia ai le faatinoina pea o lenei faafouina tāua. Na saunoa faafetai le Taitaifono ile Pule ole NET Joyce Sipeli ma lo latou ofisa e tusa ole talileleia ole SAASIA i Ueligitone i lo latou ofisa. Faapea foi ona faafetaia le auusufono ma le ofisa fou ole Asosi a SAASIA i Ueligitone. Manuia fuafuaga uma o lenei tausaga.
