O le Aso Toonai, 5 Iuni 2010 na faatumulia ai le maota i Lotomua e afio ai le Maopu o le Tuiaana i Saanapu, o le afioaga o Anapu ma le Toalima o alii, le fetalaiga ia Tuigaleava ma le mamalu o le faletolu, ae na usu faaaloalo ai foi le paia ia Satunumafono i le faafotutupu a le Afioga Tuiafelolo Laufou Taavao Volē ma isi e aofia ma le pule o le Soifua Maloloina a Samoa Dr Stanley Dean i le Suafa Tuigamala.
Ua lē o toe po se lilo i le silafia e le atunuu, aemaise Samoa i Niu Sila, o le afioga ia Tuigamala Tuiafelolo Laufou Taavao Volē, o ia le uluai Pasefika ae o se tamafanau foi a Samoa, na uluai faamaonia aloaia le avea ma faufautua i mataupu tau femalagaiga i totonu o Niu Sila, talu mai ai ona faia lea suiga i taiala a le Matagaluega o Femalagaiga a Niu Sila.
Na amata lava lenei sauniga mamalu i le sauniga lotu na taitaia e susuga i faaafeagaiga EFKS a le afioaga, susuga ia Iakina o Saanapu-tai ma Danny Epati o le EFKS a Saanapu-uta.
Na mae‘a lea ona alo ai lea o le afioaga ma le itumalo aemaise Samoa potopoto i le aliitaeao ma le usualele ma tapaipu ai lea o le taeao i ē na faasuafaina i le Suafa Tuigamala ma suafa faleupolu e pei o le Luamata, Aotele ma le Numiamalii.
O le fetalaiga a Lesa Niko o se tasi o tulafale faiupu o le afioaga na fetalai e faapaia ma faamanuia nofo fou.
Na saunoa foi le sa‘o i le Afioga Anapu Aialii e faafetaia le nofo a Suafa Tuigamala mo lenei fuafuaga lelei, e tusa ma nofo ua faatinoina o le a aogā mo le nuu ma le atunuu.
Na matuā lagona le agaga faafetai o Taavao Volē i lona aiga, uso ma tuafāfine ma a latou fanau aemaise le aiga potopoto ma si ona nuu pele ona o le faaeaea ma lo latou faatuatuaga ia te ia mo le tauaveina o le suafa o lo latou aiga.
O nofo nei na faapogai ia Tuigamala Anetipa Lam Sam, Tuigamala Seuseu ma isi o le nofo a Suafa Tuigamala.
Na taape le afioga ma le itumalo ma Samoa potopoto ma le malie i faaaloaloga e tusa ma le faafotupu ma faanofonofo na saunia e le nofo a suafa i lea aso.
(faamatalaga na tuuina mai)
