Faafotu tupu suafa Leota i Saletele

O se taeao toto‘a ma le manino a o aofia potopoto le Falelua faapea le itumalo malosi o Anoamaa i Sasa‘e tainane le usoga a Tumua ma Pule faapea Samoa na potopoto, i le maota i Lalovi i le afioaga o Saletele, auā le aliitaeao o le faafotu tupu o le suafa Leota aemaise le faafotu o le vaaulu o nisi o suafa matai o le auaiga o le afioga i le Sa‘o, le afioaga ia Tevaseu Lemalu Fasavalu Satupai Tevaseu ma le aiga sa Tevaseu, tainane suli ma feoi o le aiga potopoto.

O le paia i le Aufaigaluega totofi a le Atua a le Falelua na saunoa e faapaia ma faaee manuia mai le Lagi mo matai fou o le aiga. Na saunoa faalaeiau foi le afioga i le Sa‘o mo lona aiga ma lona nuu, “O le matai o le auauna, e tatau ona tautala i le amiotonu, asoa i lona ua le alofa ma le onosai, ma ia laei i le faapalepale ma le lē faaituau, ona ia faamanuia atu lea i lona auaiga. O suafa o matai fou na faapaiaina, afioga Leota Susi Toleafoa Tevaseu, afioga Leota Siilasilupevaelei  Faleono, afioga Leota Tanimo Sio Vitale, fetalaiga Aliimuamua Ioane Taisia, tofa Faleola Vito, tofa Seumalo Tovio, ma le tofa Lalovimama Saveasiuleo, o le afioga i le Sa‘o na faapogai mo nofo uma a lona auaiga sa Tevaseu.

 Afioga Tevaseu (lona 3 mai le itu taumatau laei lanu moana) ma matai fou o lona auaiga