Soo se matai tausi aiga, e le moenoa ae moe manatunatu ia aua ne‘i ta le efu o le fau i le aiga ona o lana tausiga. O se tasi o vaega autu o nei faalepo, ina ia aua ne‘i motu gafa o aiga faapea ai suafa aua ua tupu afioaga ma ua tagata foi aiga.
O le ala lea e mafua ai ona fai ma faatino le nei tu ma le agaifanua a Samoa, o le faasuafaina o suli ma gafa o aiga ina ia maua ai le fealofani ma le mafuta vavalalata, e faigofie ai taupulega, a o faasinomaga mo e o aitaumalele.
O lea ala lea o le tafa o se faautaga i matai tausi aiga i se tasi o faletama o le isi itupaepae o le suafa Sooalo i Lalokava, Samauga Savaii.
O le tofa Sooalo Setu Mua o le na taiulu i tapenaga o lenei faamoemoe, o se tasi foi o matai faapogai i nei saofai, na ia faailoa ma faamatala nisi o itu taua o lenei faamoemoe.
E toaono i latou na sao i matau i lenei faamoemoe. O le Tofa ia Sooalo Fiaalii Mariner, e pei ona silafia ai e le atunuu o loo nopiai i Aukilani, i lana tautua o ia o se alii inisinia e pei ona iai lana pisinisi i Otara, Aukilani. O Sooalo Otilia Sooalo Simeona, o se faiaoga o le gagana Samoa i le Iunivesite Aoao o Samoa. O Sooalo John Fui S. Polo, e fai lana kamupani taavale rent (Loanifoa Rentals) o loo i Vaitoloa i Samoa.
O le tofa a Sooalo Faamanu Saolotoga o se kamuta, sa gafa ma le galuega o le malumalu o le Atua i le Afioaga lava o Sa‘o e Fa ma Samauga. O le Tofa ia Sooalo Fili Afato, o loo galue i le ofisa o le Fuimu i Apia, ma le Tofa ia Sooalo Togiai o se tama tausi aiga o loo nofo mai pea lava i le aiga ma le nuu ma fai le faiva o le tausi aiga.
O sauniga faapenei e toe lagona ai le tuumumusu a matua ua lagomau mai tuugamau. E le ma taofia le loimata maligi ona e manatua ai matua ua le toe mafuta. O le isi itu matagofie o nei faamoemoe, o le logoitino ma le logoilagona o faamanuiaga a toeaiina.
Tauaao le ipu a lea toeaina ma faapea mai… “Valaau le Atua ia Mose, e alu e aumai lona nuu ae tali Mose…ou te le iloa se tala e fai…fai atu le Atua…tau a o le alu, ou te avatu ia te oe le upu e fai.” Faamanuia le ‘ava a le isi toeaina… “Fai mai Peresetene Keneti, Aua ne‘i manatu o le a se tautua a Amerika mo oe, ae manatu i sau tautua e fai mo Amerika.” Se‘i vaai i le matagofie o lafoga a toeaiina. O le ala foi lea o le matagofie o lenei faamoemoe ona o le tamaoaiga o le faautaga sasaa ma le tofa tatala e faafuluina ai tiuga o faamoemoega faapenei.
O se agaifanua taua aua e toe taitai ai le tagata i lona faasinomaga. O moomooga o matai tausi aiga, ina ia maua ni taitai se toatele e faigofie ai ma fealofani ai le aiga.
Manuia le seei mai o suafa fou i le tautuaina o le aiga, faatonufolau le mana lilo o le Silisili Ese, ma ia faagaganaina outou e le Atua fetalai!
Faamatalaga na tuuina mai
