Faafoi mai Alatasi Tupou i Samoa

O le alii taalo o Alatasi Tupou
O le alii taalo o Alatasi Tupou

E le’i taunuu ona taalo ai le kapeteni o le au taitoafitu a le Manu Samoa le susuga ia Alatasi Tupou i le taamilosaga taitoafitu a le World Rugby i Lonetona i le faaiuga o le vaiaso ina ua toe faafo’i mai ai mai Lonetona ao lei amatalia ai lea taamilosaga.

I se pepa o faamatalaga na tuuina mai e le Iuni Lakapi a le atunuu i le vaiaso na te’a nei na taua ai e le pule sili o le aoga lakapi a le High Performance Unit le alii papalagi mai Ausetalia o Zane Hilton, o le toe faafo’i mai ai o Alatasi Tupou i Samoa ina ia faafesaga’i ai ma se faamasinoga o amioga mo tama taaalo a le Iuni Lakapi lea ua faamoemoe e faia ai i se aso o le vaiaso nei.

I lea pepa o faamatalaga na taua ai e Hilton e matua le taliaina lava e le Iuni Lakapi nei ituaiga o amioga faapenei mai tama taaalo a le Manu Samoa aemaise soo se tama taalo lakapi lava.

E iai le malalamaga a le tatou nusipepa, o se vevesi na tulai mai i le po o le aso toonai 26 o Me ina ua tuuina atu se tagi i le ofisa o leoleo mai se tasi o tina ma sona alo i le laulauvavale ai lea o Alatasi Tupou agai i lea tina ma si ona alo.  Taua i lea lava ripoti, o le faafitauli lenei na tulai mai i le afioaga o Matautu Tai i le vaega o tele ai fale kalapu mo tafaoga, ao poloka ai e le taavale a Alatasi Tupou le auala ao le taimi lea o tulai mai ai se feseeseaiga i le va o Tupou ma lona toalua i totonu o le taavale.

Na agai mai le taavale a lea tina ma lona alo ma o laua pasia ai le taavale a le alii kapeteni o le Manu Samoa, peitai na toe tulituliloa mai e le taavale a Alatasi Tupou lea tina agai mai i le auala laupapa i Vaisigano ma laulauvavale ai Tupou agai i le taavale a lea tina.

Ta’ua foi e lea tina e tusa ai ma lana tagi na tuuina atu i le ofisa o leoleo, na agai sa’o mai ma lona alo tamaitai i le ofisa o leoleo peitai e lei mafai ona taofia ai Alatasi Tupou i le faaauau ona ia tuliloa mai le la taavale ma ia laulauvavale atu ai i le tina ma lona alo tamaitai.  O iina tonu lea na maua ai e le ofisa o leoleo ma tuuina atu ai loa le tagi a lea tina i le ofisa o leoleo e pei ona molia ai loa le susuga ia Alatasi Tupou.  Na ta’ua e lea tina na matuā faateia lava o ia i le gaioiga a le susuga ia Alatasi Tupou ona o se tasi o tama taalo e maualuga tele le autilotilo iai a alo ma fanau laiti e fiafia tele i le taaloga o le lakapi. E lei manatu foi lea tina e mafai ona faatino e Tupou lea gaioiga.

O le taeao ole Aso Sa na sosoo ai na ta’ua ai e le tina lenei le toe valaau atu o le tuaa poo le tama o Alatasi Tupou ma faatoese atu ia te ia ma si ona alo lea na mafua ai ona toe ave i tua e le tina lana tagi na tuuina atu i le ofisa o leoleo,  peitai na faaauau lava ona molia ai e le ofisa o leoleo Alatasi Tupou ona ua soli e le alii kapeteni le tulafono o le ave taavale ‘onā, poo le tagofia o le ava malosi a’o ia faafoeina le foeuli o le taavale.

Na faamaonia mai foi e le sui sooupu o le Matagaluega o Leoleo le susuga ia Auapaau Logoitino Filipo le molia ai o Alatasi ma o le aso 19 o le masina lenei o Iuni e tatau ona tulai ai i luma o le faamasinoga.

Na tulai mai lea faaletonu i le po o le Aso Toonai ae Aso Sa na sosoo ai tuua e le au taitoafitu a le Manu Samoa le atunuu mo le taamilosaga taitoafitu i Lonetona Egelani lea na malaga ai Alatasi Tupou, ae na faato’a maua e le Iuni Lakapi le ripoti lenei ina ua faasalalau ai e le media i Samoa lea na mafua ai loa ona faia le faaiuga a le Iuni Lakapi e toe faafoi mai i Samoa le susuga ia Alatasi Tupou.

O le susuga ia Alatasi Tupou o se tasi lenei o sui tuai o le au taitoafitu a le Manu Samoa lea na siamupini i ni nai tausaga ua alu a’o taaalo faatasi ai ma nisi o sui tuai iloga o le Manu Samoa Sevens e pei o Lolo Lui ma Uale Ma’i.

O le taimi foi lenei o lo o konekarate ai le susuga ia Alatasi Tupou i lalo o le Iuni Lakapi a Samoa e pei ona maua ai o latou totogi tau tupe i vaiaso taitasi. I nisi o lipoti na faalauiloa ai e le alii Palemia, le faamuta e le Iuni Lakapi o le konekalate a Alatasi Tupou ma ua leai foi ma se isi avanoa mo ia i le ‘au taitoafitu a le atunuu.

Na saunoa foi le Palemia o nei uiga matagā e lē taliaina e le Iuni Lakapi, aemaise ai o Alatasi Tupou o le kapeteni o le ‘au, o ia e tatau ona fai ma faataitaiga lelei, ae lē o le taulamua o ia e fai faataitaiga leaga i tama taaalo.