Faafiafiaina mātua i le iuga o tausinioga a le fanau

Faauuga a le Tamaki College

O le tele o tausaga e faalogo ai fanau i mātua o faapea, o le fua lava e te lulu e te toe selesele, o le tama poto foi na te faafiafia i lona tamā, a o le tama valea e faanoanoa ai le tina.

O le aso foi lea e talitalia ai e mātua se fua poo se tali a fanau i le usu i le taeao ma le tapuaiga o loo faia i aso taitasi auā a latou aoga aemaise o se lumanai manuia. O le vaitaimi lava lea e toe totogo ai le moemoe fou i lagona ma manatu o mātua ma fanau pe a faaletonu lea tausaga.

O le afiafi o le Aso Gafua 3 Novema na maitauina ai loimata maligi o le fiafia ma le faafetai i le Atua i totonu o le hall a le aoga a Tamaki College i Glen Innes, lea sa faataunuuina ai le faauuga o vasega matutua 11, 12 ma le vasega 13.

Na tumutumu mātua o aiga o susuga i faafeagai ma o latou faletua o loo aooga o latou alo i lenei aoga i le molimauina o le tolaulauina o fanau ua faamanuiaina lo latou taumafai i lenei tausaga. O le Kolisi o Tamaki o se tasi lea aoga o loo faatupulaia ai le toatele o fanau Pasefika aemaise lava i alo Samoa.

E silia i le to‘a 10 fanau o le tatou atunuu sa maufaailoga i lea po ma sa matuā faafiafiaina ai mātua ona o le tali mai i le latou tautiga i aso taitasi i le usu i galuega ma le tapuaiga ina ia maua se ‘ai mo le faaiuga o le tausaga.

O nisi o fanau sa faamanuiaina lo latou taumafai i lenei tausaga, o Poutoa Alatupe na maua lona faailoga o le Automotive Engineering i le tausaga 11, Utufiu Niko o le faailoga o le Mathematic, Design & Visual Communication ma le Soifua Maloloina (Health) ma o ia foi sa sili aoao i le vasega.

O le tausaga 12 na sili aoao ai foi le isi alo o le atunuu ia Millie-Terisa Mara, ma sa faamanuiaina foi i nisi o mataupu, i le English, Social Studies, Physical Education ma le Certificate of Merit in Biology, ae o le tausaga 13 na lautogia ai le tamaitai ia Laura I‘u o le Head Girl lea o le aoga sa mauaina le faailoga i le History, Certificate of Merit in Social Studies, ma le ipu o le Head Girl faatasi ai ma lana sikolasipi e aoga fua ai i le AUT University i Aukilani mo le 3 tausaga.

O Vaiaoga Matavao – Geography, Certificate of Merit in History, Certificate of Merit in English, Certificate of Merit in Mathematic with Calculus ma o ia foi sa sili aoao i le aoga i lenei tausaga. O Seleni Misa – Certificate of Merit in Media Studies ma Paul Sioneuesele na mauaina le ipu o le tamaitiiti e galue malosi e lē faalogolog tiga na te faia foi faataitaiga lelei i totonu o le aoga i mea uma e faatinoina ma avea foi ma lima taumatau o faiaoga i mea e faia (APF Cup); na ia mauaina foi le avanoa sikolasipi e aoga fua ai i le AUT University i Aukilani i le 3 tausaga.

O le toatele o nei alo ma fanau ua faaiuina lo latou taumafai mai lenei Kolisi ma ua sauni atu nei e faatāua le avanoa e aoga faasikolasipi ai i Iunivesite ma le sailia o nisi avanoa e ave ai ni a latou course e faalautele ai le iloa ma le tomai auā lo latou lumanai manuia.
Paul Sione, Utufiu Niko

Poutoa Alatupe

Seleni Misa

Tamā ia Faifai Sione ma le tina ia Kisa Sione ma lo la alo ia Paulo ua faamanuiaina le taumafai i le kolisi a Tamaki College