Ua na’o lagona ole fiafia ma lagona ole faafetai na vaaia i susuga i faafeagaiga ma o latou faletua faapea mātua o matagaluega e sefulu ole Sinoti i Matu, i totonu ole hall ale ekalesia Metotisi i Grey Lynn ina ua latou molimauina galuega lelei ale fanau na faamalieina ai o latou loto ina ua faataunuuina ma le manuia le laugatogi.
Ole susuga ile Sea ole Sinoti ia Rev Masunu Utumapu o lē sa ia taitaiina le taulaga ole viiga ma le faafetai ile Atua i lea aso, faatasi ai ma lana faamalosi i fanau aoga uma e faapea, “Fanau e tāua ma aogā le toaga e faitau le Tusi Paia.”
Ole luitau na toe tapue ai le olaga ole tamaititi ina ia iloa lona faasinomaga ma lona tapasa e manuia ai lona olaga ile lumanai, ae ose fafagu foi lea i mātua ma faiaoga Aso Sa, ina ia faamalosia le aoaoina ole tamaititi ile faitauina ole Tusi Paia.
Auā fai mai upu ole pese e masani ai fanau Aoga Aso Sa, faitau le Tusi Paia ma tatalo i aso uma ona tuputupu ai lea, a a’oa’o foi le tama o laititi e tusa ma ona ala a oo ina matua e le toe tea ese ai.
O leo ole valaau faamalosi ma le lagona ole fiaifa o nai tina ma tama ina ua faalogologo ma le totoa a’o tolaulauina mai ele susuga ile faafeagaiga ia Rev Ioane Leilua ole pule lea o autalavou ole Sinoti i Matu tulaga o nai fanau ua faamanuiaina mai ile Vasega Muamua A seia oo ile Vasega 10.
Ua vaaia foi foliga fiafia o susuga i faafeagaiga ma o latou faletua mai ekalesia e sefulu auā ole latou lea galuega sosoo faatasi ma faiaoga aso asa ile aoaoina o fanau ile Tusi Paia. Ole tama poto e fiafia ai le tama a’o le tama valea e faanoanoa ai le tina, a’o le aso lea ua leai se tina e faanoanoa auā ua tutusa uma ai tamaiti ile seleselega ua faia.
Mai ile Vasega Muamua A e oo ile Vasega 9 na ole tulaga muamua e oo ile tulaga tolu na lautogia i lea aso, ae sei vagana ai le Vasega 10 e sefulu ono fanau sa sue ai, lea lava sa faamanuiaina uma ai tamaiti e toasefulu ma le fa ile Tusipasi Auro ae toalua sa maua Tusipasi Siliva. Ole faletua ia Sulu Elifasa Vaituutuu, Rev Alesana Asiata, faletua ia Senerita Utumapu ma le afioga ile Sea ole sinoti ia Rev Masunu Utumapu na latou tauaaoina togi o nai fanau. Ile aotelega ole Sinoti i Matu na sola ai le alii o Michael ma le siamupini ole sili aoao ole Vasega 10 faapea le sinoti atoa, ae tulaga ono ile faasologa o tamaiti Aoga Aso Sa ole ekalesia aoao ale Metotisi.
O faailoga ale fanau na tapenaina lea ele Sinoti i Matu, faatasi ai ma le lagolago ale kamupani ole Sei Oriana i Magele, a’o faailoga ale Vasega 10 na saunia lea ele ofisa ole ekalesia i Samoa. O faafiafiaga a autalavou na faafiafia ai le autalavou mai Maugalaki auā o latou lea sa nofo ai le talita ole Vasega 10 ile tausaga ua mavae, faapea le autalavou mai Te Atatu auā o latou lea ua nofo ai le talita i lenei tausaga.
Tusa ai ma faavae ma taiala ole Ekalesia Metotisi Samoa ile faatulagaina o ana suega mo le sinoti ma le ekalesia aoao, o suega uma lava e seki pe faatulaga mai i totonu ole ofisa tutotonu i Samoa. Ma o nei suega uma e fuafua lava fesili i taiala ma tusi faitau lea ua tuuina mai i falesa poo aulotu taitasi e aoaoina ai fanau aoga. Ole aso 27 o Me sa faia ai le suega lea mo Sinoti taitasi uma ale ekalesia Metotisi, ma sa galulue ma feoai ai susuga i faafeagaiga ma faiaoga Aso Sa ile vaavaaia o suega ale fanau. I totonu ole sinoti i Matu e sefulu matagaluega oloo aofia ai, ae sa sue ai fanau mai le Vasega Muamua A seia oo ile Vasega 10.
O pepa suega uma a vasega laiti e togi lea ele ofisa ole sinoti latou, ae sei vagana ai pepa suega ale Vasega 10 e lafo lea i Samoa ile ofisa tu totonu e togi mai ai ona maua mai lea ole iuga ile taimi e usu ai le Koneferenisi tele ale ekalesia i Samoa.
