O le tamalii o le atunuu ia Leitu Magele Sisifo ua loa le silafia e le toatele o tagata i ana faatuga i musika faapea foi i faafiafiaga i totonu o aoga, e ala i cheer up a le Kolisi o Samoa i taimi o taaloga afeleti i le tausaga e 1993 i le 1997, ua taunuu nei i Aukilani i le tatalaina o lana CD Vol 3 ua faaigoaina o le “Tagi a le Matuaoti.”
O lea igoa ua faaigoa ai le CD o se mea moni sa tupu i se tasi o ana uo faiaoga alii sa fanau si ona toalua, ona ola lea o le pepe ae maliu le tina o le aiga. Ma o se lagona ootia na oo i ai lenei tamā aemaise i lona alo tamaitai auā o lona olaga atoa ua ola a‘e lava, o loo iai le mea o loo misi i lona olaga o le leai o se tina.
Ae afai foi e sui se isi ona tina e lē mafai lava ona toe maua le alofa moni o lona tina na ia tauaveina o ia i masina e iva. Ae lē gata i lea o nisi o mātua Samoa o loo liliu mai o latou alo e nisi o tauusoga i atunuu i fafo ae lē toe mafaufau atu i mātua moni na soifua mai ai.
E 13 pese o loo tusia i luga o lenei CD, ma e fā masina sa pueina ai ma tuufaatasia e le fale puepese o le Tama o le Puaseilala i Salelavalu i Savaii. O le tausaga e 2008 na gata ai le CD lona lua a le susuga ia Leitu Magele Fiu a o lea faatoa toe sosoo mai lana Vol 3 ona o le pisi i tiute ma galuega e pei ona galue ai. O le 2009 na ia toe amata ai loa ona toe faufau ma fatufatu nisi o ana pese ma tuufaatasia ai loa lana CD lenei ua faaigoaina o le Tagi a le Matuaoti.
O le susuga ia Leitu Magele o loo galue nei faiaoga i le Kolisi o Mataaevave i le motu i Salafai, ae o lona faamoemoe ma le faaaogāina o lana taleni ma le meaalofa mai le Atua e ala i le musika, ua ia naunau ai lava e tusi pese ma tuufaatasia ai le CD. O loo mafai foi ona tufa ma faasoa lana taleni i totonu o le kolisi o loo galue ai e ala i le aoga musika ua faatinoina i le aoga.
Ua tapena atu nei i sana faafiafiaga i le po o le Aso Faraile aso 22 o Ianuari i le Kalapu faafiafia o le Orator i Papatoetoe auā le faalauiloaina o lana CD. E $10 le ulufale ae $15 e faatauina ai le CD i lea po.
O le susuga ia Leitu Magele e mai le afioga o Iva ma Salelologa ae o lona faletua e mai le alalafaga o Faala i Palauli.
