Sa faateia le maimoa a le atunuu i le matagofie o tapenapena sa iai le aumalaga a le Silamanino i lana koneseti muamua lea sa faataunuuina i le Nafanua hall PIC i Avondale i le po o le Aso Faraile 18 o Oketopa.
O le lolofi atu o le toatele o le atunuu o le fia vaai lava ma fia mafuta i tamalii, faletua aemaise o fanau o loo galulue ma faatinoina le ata tifaga ua logologoa i totonu o Niu Sila le Silamanino. Sa lilo i o latou manatu o se tulaga maualuga lea o le a oo iai le po. Se o le ola o faafiafiaga ma le malie o le tamaitai o Jojo na galo ai le fia taumafa o le isi loomatu ma le isi toeaina, ae le gata i lea ua le uma ai le fia tulai e lafo sina seleni e talimasineia ai le matagofie o sauniuniga o le afiafi.
O nisi o tagata sa fai si tuai atu ae o nisi sa le uma le fia mafuta, o lea sa latou toe tulituli ai le isi faafiafiaga lona lua i le hall i Malaeola i le po o le Aso Toonai.
O le tama matua ia Ki’alagimua o le taitai malaga lea o le faigamalaga, ma o ia foi sa fai ma sui o le malaga mai Samoa e faafeiloaia le mamalu o Samoa potopoto sa auai, ao le afioga ia Fuatamalesa Tano sa fai ma fofoga o le po. E eseese lava suisuiga sa iai, o siva, o tala, faapea foi i musika. Sa faapea foi ona vaevaeina le au i nei vaega taitasi e pei ona fagasolo ai le faamoemoe. O le faili a le Silamanino sa faafiafia i lea po, e pei ona logologoa ai le siu fofoga malie o le susuga ia Ben Vai ma le tamaitai ia Robyn Akari faapea le teine o Jojo.
Na tatala le poloakalame i le usuina o le vii o le saolotoga o Samoa ma faagasolo ai loa faafiafiaga. O nisi vaega o lenei koneseti oni vaega o loo aumai i totonu o le ata tifaga, ae ua mafai ona faatino tu sao i lea po ona o le fiafia ai lava o tagata matamata ma le maimoa a le atunuu. O le faatonu a le ata tifaga o le Silamanino le faletua ia Toepo Eliza sa gafa ma le faalauiloaina o suafa o le aufaigaluega faatasi ai foi ma o latou afioaga ma galuega o loo galulue ai i Samoa.
O upu mulimuli o le po na toe saunoa iai le taitai malaga le tama matua ia Ki’alagimua e momoli le faafetai i le mamalu o le atunuu sa au tovaa atu e apogi le faamoemoe a le Silamanino. E lua vaiaso o loo taamilo ai lenei faigamalaga i totonu o Aoteroa, ma sa taunuu mai i le aso 14 o Oketopa.
E toa 22 le aumalaga ma ua maea foi ana faafiafiaga e lua i Aukilani faatasi ai ma lana asiasiga, i le faafeiloaina o nisi o kamupani o loo latou lagolagoina lenei faigamalaga, o le Aso Tofi na latou asia ai RSL i Henderson, My Samoa Takeaway i Kelston, Ulutoa & Sons i Avondale, Vision Recording i Otahuhu, Ulutoa & Sons I Otahuhu ae faaiu ia Frankie I Magele.
O le Aso Toonai na malaga atu ai i Otara ma feiloai i le Evelina Takeaway ma le Samoa Money Transfer. O nei auaunaga uma sa faapea lea ona tapena a latou taumafataga ma vai taumafa aua lava le fofoga taumafa o le faigamalaga.
O le Aso Lulu o le vaiaso fou o lea faapea lea ona tuuvaa atu ai mo Ueligitone mo nisi foi ana faafiafiaga i Lower Hutt ma Porirua ma toe taliu mai loa ma sauni e toe foi i Samoa i le vaiaso fou.
