Faafiafia Ekalesia Katoliko Safotu i Aotearoa

E to‘a 43 le aumalaga a le Ekalesia Katoliko a Safotu na taunuu mai i le aso 4 o Oketopa i laufanua o Aotearoa mo le latou malaga taamilo e ala ia latou faafiafiaga.

O le taimi muamua lenei ua asia ai e lenei Ekalesia Niu Sila ona o se tali valaau e ala i le mafutaga a alo ma tamafanau a lenei afioga o loo alaala ma papaaao i lenei atunuu.

O le mafuaaga o lenei valaaulia ona o le faafiafiaina o le maimoa ma le faalogologo o le afioaga i le taumafaiga sa alo atu i ai le aufaipese a lenei Ekalesia e ala i le latou DVD sa pueina faapea ai foi ma le CD pese.
O le afiafi la o le Aso Faraile ua mavae, aso 10 o Oketopa sa tatala aloaia ai loa a latou faafiafiaga i le hall a le Seneterisa i Magele. O le mafutaga lava a alo ma tamafanau o Safotu o loo faatamā ai le afioga ia Patele Felise sa latou faapolokalameina lenei faamoemoe.

O le toatele o tina ma tamā matutua faapea uo ma ē masani sa tumutumu ai i lea po i le molimauina o faafiafiaga a tama mai Samoa, ae lē gata i lea o lupe faalele a le afioaga sa auai uma atu lava e lagolago ma togi sa latou maa. Ua taunuu ai ma upu e masani ai le atunuu ua iloa ai ma le Isaraelu moni.

O le fofoga o le po o le susuga i le taitai malaga ia Lavea Laulaufolasa Solomona, o ia foi sa faafeiloaia le mamalu o le atunuu sa autovaa atu. E maeu le matagofie o le tapena a le Ekalesia mai Safotu, o pese faaleagaga ma tala faaleagaga, o talatuu o Samoa ma siva Samoa sa suifefiloi ai le maimoa a le atunuu, aemaise o siu fofoga mālie o le aufaipese lauiloa o le Nato Brothers lea o loo tele ina fiafia i ai le au faalogologo i ana fatuga.

O le tele o aitema a lenei Ekalesia o loo sau uma i totonu o lana DVD ae ua mafai ona toe silasila i ai le atunuu i lona faatinoina i lea afiafi. Sa vaaia foi i lea po le tele o le alofa tulai o le atunuu e ala i meaalofa tupe.
Na mae‘a le polokalame ona momoli lea o le agaga faafetai o le susuga i le taitai malaga ia Lavea Laulaufolasa Solomona i le mamalu o le auvalaaulia e tusa ai ma le soosoo tau‘au atu i le latou faamoemoe, ae o le tamā matua ia Lavea Tovio sa fai ma sui o le mafutaga i Niu Sila nei e faaleo sa latou faafetai i le malaga mai Samoa e tusa ai ma le latou sauniuniga. Na faamae‘a le po i le tatalo faaiu na saunia e le afioga Patele Felise ma fai ai loa ma le iputi na saunia lava e le mafutaga.

A o le saunoaga a le taitai malaga, o le auga lava o lenei faigamalaga, o le talia o le valaaulia na avatu e le mafutaga a Safotu faatasi ai ma se saili manuia auā lava le faaleleiina o le lotoifale o le ekalesia Katoliko. O le tofa ia Faimalo Muliagatele Allen Stower na ia lagolagoina (sponsor) lenei aumalaga, ma o loo nofo lava le tagata i lona aiga.

O le susuga ia Maiava Mose Paletaoga Kerisiano ma Mafutaga Seualuga sa nafa ma le aoaoina ma le tuufaatasia o lenei faamoemoe ma e lua masina sa faatinoina ai.

E toe tasi le latou faafiafiaga tele e faia i Malaeola i le aso 26 ae o le aso 18 o le a faia ai se latou sailiga seleni i le hall lava a Seneterisa ma tatala ai ma le MTV ma le CD fou Vol 11 a le Nato Brothers i le Nite Club i New Lynn i le po lava lea.

O le aso 31 o le masina lenei ua iai le faamoemoe o le a toe taliu uma atu ai lenei faigamalaga i Samoa.
Autalavou Ekalesia Katoliko mai Safotu i le latou faafiafiaga muamua i laufanua o Aotearoa

O se tasi o latou tapenaga i tala faale-Tusi Paia

Se tasi o vaaiga i sauniuniga a le Autalavou a Safotu

Taimi o faafiafiaga a le autalavou Katoliko mai Safotu