O le tala i le Tuimanu‘a ma lona maota na paepaevalu, e faavalu ona faatulou, ua faapena foi ona atu lasi le fia faaleo o se faafetai. O le agaga lea o le komiti na faamaopoopoina se sao o Samoa i Aukilani mo nai o tatou uso mai Fiti ma Tonga, ona o mafatiaga o le afā o Winston.
Pei ona agiga i luga o le ea i faasalalauga o lenei faamoemoe, ma amatalia ai i le Aso Gafua, 29 o Fepuari seia oo i le Aso Toonai 05 o Mati, e matautia le matagofie o le tali mai a si o tatou atunuu.
O le natura o le Samoa, o le mativa fesagai, e faapea foi se maitau i lena vaiaso i le taupati mai o le atunuu e mafatia faatasi ma nai uso tuaoi ua afatia.
E muai fia faafetaia le faatofala‘iga foai a le atunuu… Faafetai Samoa…ae maualuga le agaga faagaeetia i le fia faafetai i Susuga i faafeagaiga ma le mamalu i Ekalesia eseese na aao ulufia ona o le alofa.
Faafetaia le Susuga i le faafeagaiga ia Lui Ponifasio ma le faletua ia Ane ona o le faaavanoaina o le nofoaga o le Ekalesia o le Life Church i Manurewa e faataunuu ai lenei faamoemoe.
E lē gata i lea ae o le mafai ona faaaogā o le auaunaga a le Radio Samoa 1593AM na logopuialiiina ai le atunuu… E iai nisi kamupani na tuu mai le tau‘au e lagolago e pei o le McCallum Industries ma le Pak ‘n Save i Manukau…faafetai le alofa ia Samoa ma uso a Pasefika.
Mo le silafia, e sefulu (10) uta tetele o taumafa, ma nisi mea aogā na foai mai e le atunuu, faatasi ai ma le meaalofa tupe e $500 ua tuuina atu mo Fiti… ae o Tonga… e fā (4) uta tetele o taumafa ma le seleni e $1,000 ua tuuina atu foi i ai, o le ma‘au o Samoa…. Faafetai foai…
O se vaivaiga o le taitaifono, Teleiai Edwin Puni, ma le komiti o lenei tapenaga…. “Faafetai tele ona o le utagia ma le lagolagoina o se faatalauula atu… ua na o ni auauna lē aogā, ae o le matou tatalo, ina ia aua ne‘i faasaga ese uaga o faamanuiaga i ala uma…ma ia manuia tele a outou Susuga i lupe faalele o le talalelei… … Faafetai Samoa…”
