FAAFETAI
A nofoia paia o ‘auoloolo o Samoa, ona faatilo lea ole laumea auā le Atua ma lona finagalo. Le pogai foi lena e faavae ai ile Atua ana faigamalo e pei ole tagavai a Sisifo ae faamuamua ile tagavai ale faigamalo ale Falesefulu ma le Manu’atele.
Le paia lena ole a epa ia ile ete a tautai aao mafola ae tapuaao le gagase o tautai matapalapala ole Talalelei oloo talafaauto i Samoa ma le lalolagi atoa ile tauasuina ole vai ole ola. Faataalolo i ona tafa’i vaaia o la latou fatuaiga tausi lena.
Tafa’i fatu foi i ao sa paia lē popo ma pa e lē solo o Samoa le ao mamala ile faasouga o ona ao ma le atu Folasa ile afua mai le Tai Samasama ole Tui Manu’a ina ua ite le malama mai saua seia pā’ia le Tai Ulaula o Nafanua na saili malo iai Tama ma Aiga o Aiga ma Tama tainane le usoga ia Tumua ma Pule ile tapuaiga ale Malo Tutoatasi muamua ole atu Polenisia.
Ae avea ia lenei laofie matagofie, e fai ai a’u ma sui ole aumalaga mai Samoa o “Suli ma Feoi o Pulepule Fonoti ma Uaine Sa’ilele” e taumafai atu ai se Faafetai faalēlava e faaleagatonuina ai le faaaloalo faale-Atua, faatupu faatamalii, ma faafaleupolu na gapatia ma fatuatia aao ulufia ai e lē gata i uso ma tuagane a’o paolo tupu ma ni gafa tau ile lagi e malu ai lenei aiga i Samoa ma le lalolagi atoa. E afua mai ia Tesema 2017 e oo mai ile amataga ole 2018, aemaise lava aso e tolu (15, 16, ma le 17) o Tesema ole faamoemoe sa feagai ai i Aotearoa nei i Manurewa.
E lētioa le tupu tamaitai o Seepa a saafi: “Ua sili mea ua ou VAAI iai, i mea na ou faalogo iai.” Se ua le ole lea! E tonu ai le saunoaga ale Sa’ousoalii: “Vaai ile magaia!” Se ose mea ua hese!
E faapito augafa le faafetai ia i latou ole a ta’ua i lalo:
Faletua ole Toeaina Luisa Mose Tuisaula ole EFIS; Faletua a’o le uso le Faletua o Otaota Alosina Vavae; Tofā ia Fa’ifa’i ma le Tausi ia Taimalie; Aloalii ma Taei Maugatai; Ole paia lava lea ia te oulua Tapunuu; Togafau ma Tupuola ole Fuaifale o Salevalasi, afio Tagaloamatua tainane oulua Matua faapea oulua Tala ole fale, lau Tofā Fa’ifa’i ole tagata o Tui Atua, susū mai Lufilufi lau afioga Magele Salamō Tupa’u; Seao Soē ma le fanau, Tane ma Aiga, Erika ma Daisy Samu, Leilua Sa’ilele lau tofā Moala Siliva ma Tuafāfine. Alo o Tamatimu Ale ma Lika: Vaisilika ma Pela. Si a’u tama Silika, vili le mobile a Magele e lē nofo se isi i luga ole fogafale lua. Ae lē faagaloina se paolo tupu o Salilo ma Shiloh (Puta) Aitaoto: Afio Su’a tainane Faumuina le Ma’opu o Tuaopepe ma le Matua o Su’a, susū Laulu ma Manu’a, Gagaifoolevao ma le fetalaiga ia Tuisavailuu aemaise le afioga ia Fonoia Niko ma le faletua. Faafetai, Faafetai, Faafetai tele lava.
Ae ne’i galo Afi’a isi ona vao:
Lau Tofā Amiatu Tosoni ole Matua o Salevaogogo, e moni a au, o oe ole “ulumatua” a Sa’ilele ma Uaine. Ae lē ta’ia oe i fale e faigata ua e faaeleelea ona o lou fai tuafafine. Fanau a Mele (maliu) ma Apelu Ifopo (maliu): Naea Mulinuu ma Rev. Apelu Ifopo Naseri Kolonefilo ma le fanau. “Love you Bro, Forgive me.” Rami ma Siliva ma le fanau vae ane outou maa salafa, Faafetai Leilua ma Moala ma oulua tuafāfine uma – Ua ta ‘ula i Pua manogi. Vaa ma Fetu ma le fanau – e faigata Vaa o oe ole Pou ole Faleiva, Ole Tumua e tausi Tupu ma Aiga o Samoa.
E faigata Sooa’emalelagi ma Alo o Tamalelagi ma lou lua Fale Aana. Talofa ua e timuia ma laina ona o lou silasila i lou Tausi ia Fetu ole Ta’uipetipeti, Seutatia ma Iliganoa – Pipii a’e lo’u laulaufaiva pe a lē manatua lou faaeleelea ona o lenei fanau. Tutulu ma Magele (Lati) Aitaoto ma le fanau, tau ina ia ola mo le Alii. Sapatu ma Taofia (ua fai i lagi le folauga) ma le fanau. Ua tulai mai tamaitai– ole ulumatua o Analeseanoa Tagaloa ole Faletua ole Suifailautusi ale EFKS e toalua lana fanau tama o loia fautua (Attorneys) ua faamanuiaina isi foi ole fanau.
O Tutulu po o Fetu e galue i faamaumauga ile maota gasegase i Motootua, Tofia, Sapa Jr. e tu lelei uma e oo ia Sa’ilele ma Ramona. Nuuausala ma Togafau ma le fanau e faigata ole tama tau Lalogafu’afu’a e tau Maota ma Lufilufi. Tusi ane uma suafa o Matua ma fanau na faaleagaina lou lua maota ona tuli mai lea ma ni FBI e totogi atu sis. Rowena, Logo, Uaine ma Kayla e oo ina tuu lo’u tino ile mutaaga, E LĒ GALO lo outou agalelei. Taui atu sautualasi ele Atua. Ile ma le uii ole tamaitai na soifua tonu ile Maota i Mulinuū, Lufilufi o SEPOLATAEMO e Afio ai SEUTATIA, ole ā nei sa’u tala? Sis, U R DA BEST. E faaiu atu e faapea, e seesee lili’a le tagata ona ole faatauvaa, ae faimai le upu: “E le asa se faiva ma se maumau.” Afai ua galo se suafa, natia i fatu alavai se aleu. A e talitonu le Eperu e “galo lava i lona lima taumatau.” Feiloai i luma ole Atua i talosaga.
Saini:
Tutuluomanulagi Aitaoto Seiuli Fuimaono
Afafine o Sa’ilele a’o le Tama a Uaine
