Ua mae‘a le vaiaso atoa o nonofo ai ni tamaitai mai i Peretania o loo faagasolo a latou taumafaiga o le alovaa i le vasa Pasefika.
O nei tamaitai ua faatu le matatia o le lalolagi o se auvaa muamua lea ua faapea ona sopo le vasa aupito tele o le lalolagi ma e tusa ma le ono masina ua mae‘a o lenei faigamalaga ae taunuu mai loa i Samoa.
E tasi le vaiaso na ona nonofo ai i Samoa, e taunuu mai ua uma le uta o taumafa na malaga mai ma i latou mai Hawaii. Na amata mai le faigamalaga i Amerika afe muamua loa i Hawaii ma malaga mai ai i Samoa nei.
O le vaiaso atoa na talimalo ai le Pulega o Tagata Tafafao Maimoa mai i Fafo faapea foi le vaa o le Gaualofa ma lona auvaa. E tele nofoaga na asia e nei tamaitai a o malolo ai.
O le vaega mulimuli o le latou faigamalaga lea ua amata nei e agai ai i Brisbane i Ausetalia ma o iina lea e faatali mai ai mo le taunuuga o lenei faigamalaga faigata. E lua masina lea ua faamoemoe nei tamaitai e alo ai le latou vaa mo Ausetalia. A o iai i Samoa na faamatala nei tamaitai i le tuai o le taumafaiga ona o le faigata o le sou o le sami ma le malolosi o galu i le leaga o le tau. Sa iai se malie na mulimuli lava i le latou faigamalaga seia oo mai i Samoa.
Na faafetai nei tamaitai i le talimalo o tagata Samoa i le iai i Samoa nei aemaise o le unai foi o se tasi o faalauiloa tele o loo malaga lava nei tamaitai ma faailoa atu i le lalolagi, o puipuiga ia mai i le gasegase o le kanesa lea ua toatele tamaitai o le lalolagi e pei foi o Samoa ua aafia ai o latou soifua.
O le faamavaega ma nei tamaitai na auai atu ai se tasi o tamaitai Samoa ua iloga i lana foi taumafaiga i luga o le sami le afioga Vaimasenuu Zita Martel ma ia tauaao atu lala o le laau o le fu‘afu‘a a o lei tuua e nei tamaitai le faigamalaga. Faaalia e Vaimasenuu o se aoga na ia maua mai i ona tuaa o le ave o se laau e fesootai ai ma le eleele a o iai i luga o le sami.
Faaalia e nei tamaitai le tāua o le afea o Samoa i lenei faigamalaga ona o le lagolago ua avatu e tagata lautele.
E tele le faataliga o lenei aumalaga i Ausetalia lea e lagolago malosi ai se tasi o tamaitai pese lauiloa o Kylie Minogue ma o ia o se tamaitai ua manuia ina ua mae‘a togafitiga o le gasegase o le kanesa o le susu. O lana faamatalaga o ia se tasi o le a faatalia le taunuu atu o lenei faigamalaga.
