O la a le Tusi, “A mae‘a ona tatou faia se galuega, ona o tatou faapea ifo lea, ‘O auauna lē aoga i tatou, Ae foi lava le viiga ma le faaneetaga i lo tatou Atua silisiliese.’
E faamanu atu lo‘u agaga ia Ieova, o mea uma foi o i totonu ia te au, faamanu atu i lona suafa paia.”
Ua tinipao le uto, o le faamoemoe ua taunuu o le laau o le soifua lea, ae i le agaga e tumu i le ava ma le faaaloalo, e laga ai se leo faatauvaa o le auauna, Samoa lo‘u atunuu pele, Faafetai Faafetai tele i lou aao mafola ma le agaga foai, aemaise o lau lagolago i lo‘u faamoemoe saili seleni mo le Laumua o le Mapu i Fagalele sa faia i Fugalei Apia i le aso 19 o Tesema 2014, sa fau ao fau po ma fetuutuunai faalaau mamafa le tu‘itu‘i ma tatalo ia alofagia e lana afio le auauna.
O lea ua mae‘a, ua tele nei upu i manu auā ua sasaa faauto manuia o le Tapaau o i le lagi, aemaise o lou titi faitama Samoa.
Na matuā matagofie naua le faamoemoe i ona laasaga uma, mai le amataga e oo i lona taunuuga, ae faapei ona faalauiloa i leitio ma nusipepa le auga ma le autu o le koneseti, o ala amiotonu lava na sa faatino ina ua mae‘a, sa tuuina atu le isi vaega i aao o Tamaitai pule ma le pulega a le Mapu i Fagalele o sa tatou meaalofa faatauvaa, ma le isi vaega mo le galuega o le malumalu i Matafele.
E fia faaaogā ai lenei avanoa faaauro e molimoli atu ai le agaga Faafetai ia i latou uma na gapatia ma lagolago i soo se vaega, nai o‘u aiga ma a‘u uo, tupu ma tamalii o Samoa, Faafetai Faafetai lava.
Ia sautualasi ona faatumu ane e Keriso e tusa ma lo outou agalelei, ia alofagia e lana afio oe Samoa i aso uma o lenei Tausaga Fou, Soifua … Richard Parker.
