E tusa ma le $50,000 le tau o se fesoasoani na tauaao atu e le Faalapotopotoga ua lagolago i le atinae o tagatānuu o Samoa, le CSSP i le aoga laititi a le afioaga o Salelesi i le Anoamaa i le faaiuga o le vaiaso na tea nei. O lenei fesoasoani ua faaauala mai i ni nofoa ma ni kesi aoga a le fanau. O se talosaga na faapea ona momoli e le alii pule o le aoga i le CSSP ona o le faaletonu ua iai totoga o faleaoga i lea afioaga.
Faaalia e le alii pule, o loo lelei lava le faleaoga a le nuu ma e lei tele atu tausaga talu ona tatala aloaia lea galuega peitai e mae‘a le faleaoga ae o loo faaaogā lava nofoa ma kesi tuai. O le oo atu la o le alii pule i le aoga lenei, le susuga Avia Pa‘u, na taumafai ai loa e saili se fesoasoani ina ia mafai ai ona maua ni meaafale mo potu aoga a le fanau.
E to‘a 145 fanau aoga i Salelesi ma o le tali o le talosaga na sau i le CSSP. E lē gata la i nofoa e 120 ma kesi e 120, ae na faapea foi ona fesoasoani le CSSP i le toe faaleleia o faamalama ma isi vaega o le faleaoga ua amata foi ona vaaia le faaletonu i le taimi lenei. Faaalia e le tamaitai o loo fai ma fesootaiga a le CSSP ma afioaga, Marie Bentin-To’alepaiali’i, e taua lava le galulue faatasi o le sosaiete a matua ma faia’oga le PTA ina ia puipuia ma fai faalelei lenei meaalofa tele aua e le taugofie.
O le a’oga muamua foi lenei ua avatu atoa lava le tupe e faatino ai le latou galuega ma ave le tupe i le kamupani na aumai ai meaafale mo potu a’oga e aunoa ma se latou sao tau tupe e faaopoopo i lenei galuega e pei ona iai tuutuuga o lenei fesoasoani. E ui o lea o le talosaga a le CSSP ia umi ona faaaoga lenei meaalofa na tauaao atu i le faaiuga o le vaiaso. O se tasi lenei o galuega ua faapea ona ofo atu ai le lagolago a lenei faalapotopotoga, lea ua tuufaatasi ai fesoasoani mai i le Iuni a Europa atoa ai Ausetalia ma Niu Sila.
Sa masani ona agai afioaga ma faalapotopotoga i ofisa eseese nei e sau ai le ituaiga fesoasoani faapea peitai o le aua lua nei tausaga talu ona faatuina le faalapotopotoga lenei ua agai sa’o ai lava le mamalu o le atunuu e tapa se fesoasoani tau atina’e ma e eseese uma lava fesoasoani e mafai ona ofo atu e lenei faalapotopotoga aua le atina’e o soifua o tagatanuu o Samoa.
