Faafetai Magiagi ia Ausetalia

O le tasi lenei o afioaga o loo ua mautū lana polokalame ua faatautaia ai aoaoga i afiafi. Ua savali i le lua tausaga talu ona faatautaia lea polokalame, ua fesoasoani ai faifeau ae e lē gata i lea o sui matutua o le afioaga i meaaoga a le fanau mai i aoga laiti (primary school) e oo atu i le fanau o loo aooga i Kolisi maualuluga i le atunuu.
Ua iai foi fanau i le maualuga o aoga faa-Iunivesite ua maua mai le fesoasoani ia i latou ua faatinoa ia aoaoga.
O le faamoemoe e pei ona ta‘ua e le tamaitai na amata maia lea polokalame, Satui Bentin, o le ofo atu o se isi fesoasoani auā le faaleleia atili o meaaoga a le fanau.
O le Taitaifono o le Aoga afiafi lea, o le susuga i le faafeagaiga o le Ekalesia Faapotopotoga Kerisiano Samoa i Magiagi lava, le susuga lea a Rev. Tuanai Uesele. O ia foi o loo tauaveina aoaoga o le Social Science ma le Gagana Samoa.
O lona faletua atoa ai isi aoao o le Ekalesia ma o latou faletua ma faletua o le EFKS i Magiagi, ua fesoasoani i le faitautusi i le Gagana Samoa ma le Gagana Peretania.
O loo fesoasoani foi isi tina o le aulotu i le aoaoina o le faitautusi ma le Numera poo le Matematika; o Satui Bentin o loo fesoasoani i le tele o mataupu ae ua matele lana fesoasoani i le Gagana Peretania.
O le susuga i le tiakono, le Afioga ia Taveuveu Fiti o loo nafa ma le aoaoina o mataupu tau i le tamaoaiga (Economics) ma le tomai faapulega (Management). O le ā lava le mataupu ua moomia ai le fesoasoani ua maua mai lava i sui o le afioaga ua ofo atu o latou tomai auā le aoaoina o fanau.
E tatala i soo se tasi le aoga lenei ma o le taimi lenei ua mae‘a le vaega muamua o le atinae o lenei taumafaiga, e pei ona iai se faletusi mo fanau – e lē gata i lea o ni masini computers mo le faaleleia lava o aoaoga.
O le faaiuga la o le vaiaso na faatautaia ai se feiloaiga a le Aoga afiafi lenei a Magiagi ma le alii Hai-Komesina o le Malo o Ausetalia i Samoa, le susuga Dr Stephen Henningham, faapea ai sui o le Ofisa o Ausetalia i Samoa.
O le feiloaiga na tauaao aloaia atu ai e le ofisa o lea Malo nisi tusi faitau, tusi faatonutonu o aoaoga eseese ma se laptop computer atoa ai se masini e faalauiloa ai ata – projector ma isi meaa’oga mo computers mo le fanau.
I se saunoaga a le alii Hai Komesina o Ausetalia, e iai le fesoasoani mo aoaoga faapea i lalo o le fesoasoani a le Malo Ausetalia ma o le unai lava foi lea a lona malo ina ia tele se lagolago e aumai ia Samoa e le gata i le Malo ae faapea foi i faalapotopotoga e pei ona molimauina i Magiagi.
O le faamatalaga a lea alii e maoae le atinae lenei ua vaaia i Magiagi ma o lana faafetai, o le mafai e tagata lava o le afioaga latou ona tulai mai e saga faaleleia aoaoga a latou fanau.
E le gata i lea ua manino le toatele o fanau ua faaaogaina lenei fesoasoani.
O le vaega lona lua la lenei o lea polokalame ma o le taimi lenei na ta‘ua e Bentin o loo ua fuafua le vaega lona tolu o lenei atinae ma o le vaega lea o le a vaavaai ai i le faamautuina o se computer lab poo se potu mo aoaoga faa-computers mo le fanau.
O le afioga Ve‘atauia Faatasi Puleiata, na fai ma sui o le afioaga e faafetaia lenei fesoasoani a le Malo o Ausetalia ma le faamoemoe o le a lē gata ai i le faaiuga o le vaiaso, lenei
va galulue faatasi ai o Ausetalia ma le afioaga o Magiagi.