E amata mai i le afioga mamalu i le ao o le Malo, le sui o le Fono o Sui Tofia, le mamalu o le Palemene i le au fai tulafono o le atunuu, le Kapeneta ae tainane taitai o le talalelei e ala i aulotu eseese, o le mamalu o pulega a alii ma faipule o afioaga taitasi atoa ai mafutaga a tina, le malosi o nuu ma le fanau laiti ua faafetai i ai le alii Palemia, le susuga Tuilaepa Lupesoliai Sailele Malielegaoi i le tutu faatasi mai e faatino le taligamalo lea ua amata a Samoa.
Faaalia e le alii Palemia i le uluai fonotaga fai faatasi ma le failautusi aoao o le SIDS o Wu Hongbo ma tusitala, o le isi la vaega o le galuega o le amio tausaafia ua unaia i tagata uma lava ina ia mautinoa e ta‘uleleia Samoa ma lana taligamalo.
O le aso ananafi na faatautaia ai le asiasiga mulimuli a Malo Aufaatasi i le nofoaga autu o le fono i Tuanaimato ma ua faapea ona faafetaia e Hongbo le taumafaiga a Samoa.
Na ia ta‘ua i le 15 masina ua tuanai lea na sau ai le isi asiasiga a le komiti o sauniuniga a Malo Aufaatasi mo lenei fono tele na tele lava galuega na ia laga ina ia faataunuu e Samoa ma o lea ua agai mai i lana asiasiga mulimuli, ua manino ai le malosi o le tulai mai a Samoa e faatino galuega na manaomia ma ua ia faamaonia le mae‘a lelei o tapenapenaga a Samoa. Na ia faafetaia foi le tali mai o le mamalu lautele o tagata Samoa i le taumafai ai e faatino lenei galuega o le faamamā ma teuteu Samoa auā lava le taligamalo ma ua iai nei le vaaiga matagofie lea ua tulai mai.
Ua muamua mai sui o le komiti o tapenaga ina ia fesoasoani i nisi lava fesootaiga ma galuega o totoe ae ua faamalieina le komiti o tapenaga i le galuega ua faatino e Samoa.
O le faamatalaga a le alii Palemia o Samoa o lea lava e tumau le aofai o tagata usufono o le SIDS i le to‘a 3000 ma e ono faaopoopo pe a vave lesitala mai suafa o le toatele.
O le faaiuga o le vaiaso lenei e tauaao aloaia atu ai le nofoaga autu o le fono tele i Malo Aufaatasi ona pulea ai lea e i latou soo se gaioiga lava e faatino i lea nofoaga tele seia oo lava ina tapunia le fono tele.
