Ua faafetai e taitai o le Malo o Samoa le alii faipule o Sagaga le Usoga, le afioga Muagututagata Peter Ah Him ona o le faaiuga na faalauiloa ai lana faamavaega mai i le tofi faipule o le Palemene i le faaiiuga o le vaiaso na tea nei.
O taualumaga a le Palemene i le Aso Faraile na tea nei a o talanoaina le faitauga faalua o le tulafono taufaaofi o le Tagatānuu o Samoa poo le Sitiseni Samoa lea na oo ai le faasologa o le faaaliga o finagalo o sui a faipule i le faipule o Sagaga le Usoga ma e toatele na faateia ia ua tulai le alii faipule ma faaali loa lona manaoga e faamavae mai i lona tofi faafaipule ma faaminisita lagolago o le Kapeneta.
O lea na faatali se faasalaga e aumai e le Faamasinoga ona o se moliaga ua faamaonia faasaga i le alii faipule. O ni tuua‘iga na tulai mai i ni feutagaiga i le va o le pisinisi a le alii faipule ma se isi pisinisi na o latou faifaimea faatasi lea na tulai mai ai lenei mataupu na oo i luma o le faamasinoga.
O moliaga la ua faamaonia faasaga i le pisinisi a le alii faipule o le faasese o faamaumauga ia ua faamaonia ma sa faatali lava le malo e pei ona sa saunoa i ai le alii Palemia atoa foi le Palemene e pei ona sa saunoa foi le Fofoga Fetalai o le Maota, poo le ā se sala e tuu mai i lea ituaiga solitulafono ona fua foi lea i ai le faaiuga talu ai, o tuutuuga lava o galuega ma tofiga faafaipule o le faamaonia o soligatulafono e mafai ona aveese ai tofiga o le Maota. E fua lava foi la i le maualuga ma le matuia o se solitulafono.
Peitai e lei faamautu mai se faasalaga a le Faamasinoga ae o lea ua fofogaina le faamavaega a le Alii Faipule. Na saunoa Muagututagata Peter Ah Him i le faigata o le faaiuga ua ia manatu e tuu mai a o tālia ai se faasalaga a le Faamasinoga, ae o lona manatu o se faaiuga ua talafeagai ona fai ma o le a tau lē faatali ai le Malo ma le Palemene.
Na faafetaia e le alii Faipule lona itumalo i le faaauau ona lagolagoina ma tulai mai mo ia i taimi ua sola a o feagai ai ma mataupu i luma o le faamasinoga. Sa ia faatoese foi e lē gata i lona itumalo ae faapea foi Samoa ona o le tulai mai o lenei mataupu.
Na faafetaia e le alii Palemia le afioga Muagututagata – o ia na talia aloaia le faamavaega a le afioga i le Faipule ma faafetaia lona sao o se minisita lagolago o le Kapeneta aemaise o le tofi o lona itumalo.
Faaalia e le alii Palemia e lē faigofie le faaiuga ua folasia e le Faipule aemaise o le umi na tulai mai ai foi lenei sui o le HRPP. Faafetaia e le alii Palemia le sao o lenei tamalii i le atinae o le atunuu.
Ole faafetai foi lea a le taitai o le Itu Agai, le Afioga Palusalue Faapo II i lana saunoaga e faafetai ai ia Muagututagata.
“Poo fea lava tatou te finau ma tutu ai i lenei galuega, e aafia loa se isi o le tatou gluega, ese loa foi lagona tatou te lagona faatasi lava le mafatia,” o le saunoaga lea a Palusalue.
Faaalia le faafetai a le Taitai o le Itu Agai ma ia ta‘ua ai e leai se isi e sili atu i lo le toa e pulea lona loto.
O le Fofoga Fetalai le afioga Laaulialemalietoa Leuatea Polatalaivao Fosi sa momolia faamafanafanaga i le alii Faipule ona o le mae‘a ai o lana auaunaga ae ua tulata i le faaiuga o lenei foi paeaiga a le Palemene.
E lē gata i lea ae o le motusia ai o le mafutaga faataitai o le malo e ala i le Maota o le Palemene, faapea foi le Kapeneta, ma na ia faafetai i le faaiuga ua faia lava e le faipule i lona finagalo e aunoa ma le tau tālia o se faaiuga mai i le Palemene.
