E malama ifo le taeao o le Aso Faraile ua pae ietoga luma o le maota o le malo ua taunuu le savali, ae o loo faagasolo lava fale komiti e silia i le 60 mai i afioaga eseese o Samoa ua iai fale lalaga faamoemoe mo faaaliga tetele nei.
O le fuataga a le Malo ua tuu mai i lenei tausaga e faamanatu faatasi ai ma le aso o Tina ma ua faia i le faaiuga o le vaiaso ae ua lē toe tuua i le aso malolo le Aso Gafua lea ua atofa e faatino ai malologa mo tina uma o le atunuu.
O le fuataga foi poo le faalelegapepe o lenei tausaga ua tasi lava le nofoaga e fai ai ae ua lē vaeluaina i le motu tele i Salafai ma le motu o Upolu e pei ona sa sau ai.
O le tausaga foi lenei ua vaaia ai le toatele o alii ua ta‘u o matuauu ma ua lalaga i le taumafaiga a fale lalaga ina ia ausia le fua lea ua aumai e le Malo mo le ie Samoa.
E lei taofia ai le tetele o ie na molimauina aemaise foi le siapo i le faaaliga tele o lenei tausaga auā e ese le tupe e maua e le fale lalaga e ausia ie ua ta‘ua o le tosi tasi e 10, ese foi faailoga eseese poo faailoga taitoatasi na maau iai le malo e faaali ai le faafetaia o tina ma tamaitai o Samoa ua mafai ona faaavanoa o latou taimi e lalaga ai le ie Samoa e pei ona unai e le malo.
E maeu foi le matagofie o nei galuega ia e tele masina o seei ai tamaitai le mamalu o matuauu ma le au seepapa i fale komiti eseese ma e iai afioaga e tailua fale komiti na feagai ma lenei galuega tele.
O le toe fafagu a le malo ua faamalosia ai lenei faaaliga tele ina ia sagai ane tamaitai o le atunuu e lalaga le ie aupito matagofie ma faaitiitia ai le soona ave o le mau ie i faalavelave ae ua lava le tasi o le ie ae sa‘o ai le upu ia tasi ae afe i lona lelei ona lalaga ma le matagofie i le vaai.
Ua lē gata la i le unaiga o tu ma aganuu a Samoa e pei ona saunoa i ai le Minisita o le Matagaluega o Mataupu Tau Tina ma Tamaitai ua nafa ma lenei faaaliga tele ma galuega nei a tamaitai, le afioga Tolofuaivalelei Falemoe Leiataua.
O se avanoa foi lenei ua mafai ai ona agai tamaitai e faatau a latou galuega taulima i fafo e pei ona iai nei maketi ua tatala mo le ie Samoa mai i Amerika Samoa, o Hawaii, Niu Sila, Ausetalia aemaise lava i Tonga.
O le tau lava o le ie lelei e oo lava i le $5,000 tala Samoa i le ie e tasi ae e umi le taimi e seei ai tamaitai e faatino le galuega.
O le meaalofa la na maua e fale lalaga na ausia le ta‘i 10 o ie tosi tasi e $5,000 tala a le fale lalaga e tasi ma o afioaga e pei o A‘ufaga lea e lua ana fale lalaga na o ese lava tina ma le $10,000 tala ave ma a latou ie e faatau atu ia i latou ua iai le manaoga e faatau nei measina aemaise foi i le siapo.
O le faafetai a le malo ona o le vaaia o le malosi o le lagolago a afioaga i le taumafaiga a fale lalaga uma ma le manaoga ina ia tamau ai tina i lenei faiva alofilima ae ia faamalosia ai foi ma le taumafaiga lea ina ia avea le matagofie ma le lelei lalagaina o nei measina ma auala e faamalosia ai le tasi pe lua foi o ie e ave i faalavelave nai i lo le taumafai e sili atu ae e lē o iai se matagofie i ie o faalavelave.
