E matagofie ma suamalie le alofa ma le agalelei le faatuaoia o le Atua i lana fanau i le lalolagi. E mitamita foi le agaga ma le lagona e faafetaia ai ma faamanuina le Atua auā e lē o masino lana tausiga faaauau mai pea i aso uma e lē aunoa. Auā o sē ua fiafia inā pese. “Lo‘u agaga e, ia faamanū atu i le Atua o mea uma foi o i totonu ia te au, ia faamanu atu i lona Suafa Paia.”
O le pese faafetai lea i nai mātua ma aiga o le atalii, le susuga ia Taupule Junior Taupule na ave ai le viiga ma le faafetai i le Atua e ala i le sauniga na saunia ma saunoa i ai le susuga i le faafeagaiga, Susuga Silo‘a Lologa i le faamanatuina o le 21 tausaga o le soifua o le atalii. Ia faamalo le soifua manuia atalii, o le viiga lava ma le faafetai tele i le Atua e lē faaitiitia ina ua aulia mai e oe le atalii pele le 21 lenei o tausaga o lou soifua. Malo le onosai faafetai foi i lou olaga tauivi aemaise lava ona o lou ola usiusitai lelei i nai ou mātua, faapea foi lou naunautai pea i soo se meafai i totonu o le autalavou ma le aulotu o loo tatou auauna ai.
O lou ola ofoina atu i soo se tiute ma taleni ua faamanuiaina ai oe e le Atua, ia faia e tusa ma le finagalo o le Atua. Ia manuia tele au fuafuaga uma mo le lumanai, aemaise o ni au moemitiga mo sou manuia. Ia manuia tele lou aso fanau atalii!
Alofaaga mai ou aiga uma lava i soo se vaega o le kelope, o nai ou tuafāfine uma ma nai o latou aiga, o mātua o ou mātua uma, o nai au uo uma ma ē masani, aemaise foi alofaaga mai ou mātua faaleagaga ia Silo‘a Lologa ma Lotofoa Lologa, ae faasilisiliina ai alofaaga e lē mavae mo oe mai ou mātua peleina o Letoa Taupule ma Sui Taupule.
