Ua tele suiga o Samoa, o se fuaitau ua avea ma ‘agaga i Samoa ona e moni ma faamaoni, o suiga o le lelei ma suiga faalē lelei foi ae ua matuā ioeina le itu lea, ua telē le suiga o Samoa.
O se tasi o suiga tele lea na molimauina i lenei vaiaso, i le amata ai o aoaoga a le fanau a le atunuu i le Kolisi o Avele, ae ua faatautaia lava e le Kolisi latou e ala i lana PTA, le asosi a faiaoga ma mātua, ma le asosi a tama ma teine tuai o le Kolisi le ACOPA, le pulea ma le faatamoega o lana lava aoga. O le kolisi muamua lea a le Malo ua faamatuu i ai lenei pulega, e pei ona vaaia i le tele o aoga a le malo i Niu Sila ae o lea faatoa vaaia i Samoa nei.
O faiaoga o loo totogi lava e le Malo, o le faataatitiaga o suega ma aoaoga e tuu atu i le fanau o loo sau lava i lalo o le Matagaluega o Aoga, peitai o ā lava isi faaiuga i le faatautaiga o le aoga ua agai uma i le Komiti ua tofia a le aoga e faatinoa lea tulaga.
O se auala na ta‘ua e le aoga o le a faafaigofie ai nisi o faaiuga e vave ona moomia e le aoga ae sa faatuai ona o le tau faatali o maliega mai i le Matagaluega o Aoga i tausaga ua mavae.
O le amataga o le vaiaso i lana sauniga lotu na molimauina ai se tasi o faiga e lē o suia i le Kolisi lenei i Vailima. O le tauaao atu lea o meaalofa tupe mo fanau sa i le vasega faaiu a le Kolisi i le tausaga ua tuanai i le Vasega 13, ua faamanuiaina nei e ofi atu i aoaoga faaiunivesite.
O se faiga na faamalosi ai i fanau le ola tauivi i le tausaga faaiu o a latou aoaoga ma ua vaaia ai pea le siisii o le numera o tama ma teine aooga i Avele ua ausia le maualuga lea e faaauau ai i aoaoga faaiunivesite.
O le tausaga lenei e to‘a 95 le fanau na faamanuiaina ma ua sauni nei i lenei tausaga e amata i le Vasega faavae o le Iunivesite, o nisi i le aoga faafaiaoga ma isi i le matata eseese i totonu lava o Le Papaigalagala.
E $100 a le tama ma le teine aoga na maua i le faatasiga o lenei vaiaso ma le faafetai a sui o mātua, faiaoga ma tama ma teine tuai i le loto tauivi o fanau ma le sao atu ai i lea vaega maualuga o aoaoga. E tusa la ma le $9,500 (tala Samoa) na tauaao atu i ia fanau aoga ma le faamoemoe o le a fesoasoani lenei tupe i le agai atu ai o fanau i Le Papaigalagala.
O le faafetai a le Pule Aoga le afioga Matafeo Reupena Matafeo, ona o le tali mai o le fanau i suiga ua iai nei le aoga, le faamuamua ua ave i le unaiga o le ola aoaoina nai i lo se isi lava tulaga, ma o le tele foi o tausaga ua tea sa tele ina tuua‘ia ai lenei aoga i vevesi ua tulai mai ma isi aoga maualuluga.
Ua finau nei le pulega fou ma le asosi o tama ma teine tuai ina ia aua ne‘i toe vaaia i Avele na faafitauli ae ia faamuamua le atamai na agai uma atu ai i le aoga.
O tausaga ua mavae ina ua faavae mai lenei fesoasoani e le aoga i le to‘a 20 sa maua lenei meaalofa ae ua telē le suiga a o agai mai ai i le tausaga ua mavae atu ma o le faamoemoe ia saga faaopoopo pea le numera o tama ma teine e agai mai i Avele o le a faamanuiaina i aoaoga maualuluga nei i le lumanai.
O le taimi lenei e latalata i le to‘a afe (1,000) le fanau ua aoaoina i le Kolisi o Avele ma o le iai o lana fono faapitoa poo le komiti e vaaia le aoga i le taimi lenei o le a faapea ona vaaia ai le tele foi o suiga ua vaavaai i ai le pulega o le aoga auā le saga unai ai o le ola aoaoina o fanau i lea aoga.
