O le paeaiga ua faata‘ape nei a le Palemene ua faato‘ā faatino ai aiaiga fou i le tatalaina ma le tapunia o paeaiga faapalemene, i le na o le amataga ma le faaiuga e afio atu ai le Ao o le Malo e malele e tatala le paeaiga ma faata‘ape ma tapunia ai a o loma le faiga palota a le atunuu.
O le Afioga Tui Atua Tupua Tamasese Efi le Ao o le Malo na ia faatino lea vaega e pei ona faia lana malelega ma ia faafetaia ai galuega lelei uma na faia e le Malo ma le Palemene i le lima tausaga o le paeaiga ua mae‘a nei.
“E maeu le galuega a le Malo ma le Palemene i lenei lima (5) tausaga i le faaleleia o ala, fesootaiga ma fafo, atina‘e o vai, eletise, o fuafuaga e faalelei atili le pitolaau a le Malo ma le aufaipisinisi, taaloga, ma le atina‘e o tagata tafafao mai fafo.
O le fuafuaga a le Malo ia tuufaatasi le Malo ma le kamupani a le Virgin Blue lea ua faaigoa nei o le PolyBlue, o se laveai ma se faaola totoga.
Auā ua se‘i au ona avea le Polenisia ma avega mamafa i le Malo ma le atunuu”. O le vaega muamua lea o le malelega.
“Nei, e lē gata ua maua pasese taugofie ma ua toatele atu tagata e malaga i le va o Samoa, Niu Sila ma Ausetalia, a o le mea sili, ua maua tupe mamā. Ma e oo foi i le Polenisia lea e feosofai i le vainuu o Samoa, o lea foi ua maua le tupe mamā. E fia afea i se upu Taaloga a le Pasefika i le 2007.
E maeu Fale Taalo ma Malae Taalo, e maeu le atina‘e o autalavou ma taaloga. E maeu le siitia o le tulaga o taaloga i Samoa i pine ma ‘ai na maua i le tausinioga o Taaloga a le Pasefika. E maeu le tala lelei i le talimalo, ua tosina mai ai ē fia asiasi mai fafo”.
“E maeu le faatāua o le atina‘e o taaloga, aemaise lea ua toatele tamafanau ua iloga lo latou tomai i tausinioga o taaloga i fafo. Ma ua avea a latou tupe e maua mai i taaloga e faatūina faalavelave o aiga, nuu, ekalesia ma le Malo.
E maeu fale taalo ma malae taalo na fausia mo le Taaloga o le Pasefika o lea ua tosina mai ai taaloga a le lalolagi ma taaloga a le atu Pasefika e faaaogā, ona e agavaa mo le faamoemoe”.
Na toe faatepa e le Ao o le Malo le atunuu faafogafoga ma le Palemene i le suiga o le auala ma finagalo feteenai sa aliali mai ai.
“E fia afea i se upu le vavaō i le suiga o le ituala e ō ai taavale. Sa umi ona avatu, aumai; sa alu solo tetee i le Palemene, sa fai faamasinoga.
E maeu le alofa o le Atua auā o mea e tutupu e iai ma lona a‘oga aogā. Aua ua avea le faitio i faafitauli e ono tulai mai, ua matuā mataalia ai le malo, le Ofisa o Galuega, le Ofisa o Femalagaiga ma le Ofisa o Leoleo, ina ia puipuimalu i ni faalavelave e ono aliali mai.
Ma ua avea lo latou pulunaunau, ua oo ane ai le lagona i ē sa faatautee, e lē mala‘ese i latou ma i matou.
Ua alo mai felagolagomai ma le Ofisa o le Malo, aemaise ai foi le taulalata mai i le Kerisimasi, ma ua faamalieloto ona ua faamaumauina ua faaitiitia faalavelave faafuasei e maliliu ai tagata. Po o ā eseesega, ae a oo i ooooga, ona tatou manatua lea o le mau tuufaasolo, O Samoa e lē o se malo, o le uso ma le aiga”.
