Faafeiloai e le Sinoti Metotisi, le Sea ma le Failautusi ma o la faletua

O le afioga i le Sea ua valaauina ma totofi mo le galuega fou i Kuiniselani, le susuga ia Rev Alefoti ma le faletua ia Seuoletoi Alainuuese o ni lupe faalele mai Satuiatua, Nofoalii & Gataivai.     O se aso sa tulimatai i ai le sinoti i le Aso Toonai aso 10 o Aukuso, na atofaina e tauaofia ai le Faasinoti Ekalesia Metotisi.
O le tofa ia Lavea Pouniu sa tu tootoo auā faaaloaloga mai le aiga o le Sea ae tali fuaitau  Manū Sione sa fai ma sui o le sinoti e faafetai atu, ae o le fetalaiga ia Tua‘au Timoteo sa tu tootoo mai le sinoti ma feagai ma faaaloaloga mo le Sea ma le aiga.
Ua tu mai foi i le foe le susuga ia Rev Tavita & Faaleava Faatoe o ni lupe faalele mai Samata & Lufilufi, ua totofi faapitoa e avea ma failautusi a le sinoti aemaise le faletua ia Faaleava o le failautusi a le auso.
O le susuga ia Lufilufi poo le fetalaiga ia Moemalo Faatali sa molimolia faaaloaloga mai le failautusi ma aiga.
O le taeao foi o le aso lava lea na feiloai ai le susuga ia Le‘i‘o & faletua ia Pesio Leilua (Sagone & Faleaseela Lefaga) ma le la ekalesia fou, le matagaluega Metotisi a Algester. O le aao tusitusi o le sinoti le susuga ia Rev Tavita Faatoe sa fai ma fofoga o le aso.
E mae‘a le feiloaiga i lea aso ua lata i le 6 i le afiafi, leai se vaega na faaletonu auā na matuai alo e fai le mea silisili e ala i faaaloaloga masani.