Ole Aso Gafua masani ale afioaga o Laulii na momoli ai le faafetai male faamalo ale afioga ile Sa‘o-faapito le afioga Leniu Vainiu Te‘o male pulega mamalu a alii ma faipule ole afioaga o Laulii ile maualuga ole taumafaiga ase tasi o alo tamaitai ole nuu ua manumalo ma pale ile Tausala o Samoa le tamaitai o Pricilla Olano.
“Ole fiafiaga sili ia te au male nuu ua a‘e manuia le taumafai ose alo tamaitai ole nuu nei, auā o faiva e tapuaia e a‘e manuia”.
Ole finagalo ole afioga Leniu Vainiu Te‘o ina ua ia folasia e avea ai ma sui ole afioaga le agaga ole fiafia male faafetai ona ose isi matatia ua ausia ese alo ole nuu.
E lē gata ina potopoto le mamalu ole nuu e faatino le fono masani ma faafeiloai ai le Tausala ua faapaleina ole atunuu, ae sa vaaia foi le lolofi atu o tina ma tamaitai o Laulii faapea le malosi ole afioaga e fia molimauina lea faatasiga tāua.
O mātua o Pricilla o lona tamā ose tamafanau o Laulii ae o lona tina ose tamaitai Fiti Rotuma. Faaalia ele afioga Leniu, sa saunia ele nuu se meaalofa tupe mole tamaitai o Pricilla ose seleni e fesoasoani ai i ana tapenaga mole alo atu e faatino ona tiute faatausala o Samoa aemaise ua amata tapena mole tauvaga ole tausala ole Pasefika.
“E lē ose mealofa tele ae ole amataga ole agaga lagolago o a‘u nei male nuu ile tulai mai ose tamafanau a Laulii i lea tautua tāua e lē gata mole atinae o tagata tafafao ae mo Samoa uma”.
E fā faailoga na manumalo ai Pricilla i faailoga togia ole tauvaga ole sailia ose Tausala o Samoa.
\ Ole Best Interview, Best Talent, Miss Photogenic poo le tausala e sili ona ata lelei, male faailoga faapitoa ole Miss Tourism award.
O lona manumalo ole toe maua ai lea ole avanoa e ausia ai ese tamaitai mai Samoa ole pale ole Pasefika.
Ole tausala Samoa mai Ausetalia na manumalo ile tausaga ua mavae, ae ole Tausala Samoa mai Niu Sila o Latafale Auvaa na manumalo ile pale ole Tausala o Samoa ile tausaga e 2014 ile 2015.
Sa manumalo foi Latafale ile pale ole Tausala ole Pasefika ile tausaga lava lea. Ole tatalo ale afioga Leniu Vainiu male nuu o Laulii ia manuia le sauni atu o Pricilla Olano ile isi tauvaga ole Tausala ole Pasefika.
Ua 25 tausaga ole soifua ole Tausala filifilia o Samoa ma oloo faigaluega ile faalapotopotoga ole siosiomaga ole Pasefika le SPREP i Vailima ile vaega o suesuega i fesuiaiga ole tau.
