“E tāua le vaaia lelei ma teuteu falelēta‘ua taofia ai faama‘i”…Jack Sim
O le afioaga o Falevao na muamua asiasi i ai le alii mai Sigapoa o Jack Sim ua faaigoa e le toatele o tagata ma atunuu i Asia o Mr Toilet, poo lana susuga ia Faleese poo Falelēta‘ua pe a tuu mai i le tatou gagana Samoa.
O le autu o le malaga mai i Samoa o Mr Toilet ma afea ai lea afioaga o le atunuu, o le fia faalauiloa o le tāua o le teuteuina faamatagofie o faleese ina ia avea ma faatosina lelei mo tagata tafafao, aemaise ia faaitiitia ai faama‘i eseese e mafua mai i le lē lelei o nei nofoaga o loo agai i ai tagata e lafoai ai otaota o le tino mai meaai o loo tausasami ai ae faapea foi le suavai lafoai.
O lenei alii sa galue o se faipisinisi e pei ona ia faamatala o lana pisinisi mulimuli o se kamupani faufale. Sa sologa lelei ana taumafaiga e ui ina sa feagai ma faafitauli. O le mafuaaga lea na ia mafaufau ai poo le ā se mea o loo sili ona lē amanaia e na te faia i ai se galuega ina ia fesoasoani ai i tagata mo so latou ola fiafia. O le faleese lava na ia muamua manatu o se tasi o vaega tāua o le soifuaga e lē o lelei ona atina‘e auā o le vaai faaletagata soifua e pei o se mea leaga ma lē tāua.
O le mafuaaga foi lea o le maliliu o le fia miliona o tagata i le lalolagi ona o faama‘i e mafua mai i otaota a le tagata e lafoai i le faleese e lē o lelei ona pulea, aemaise o nisi atunuu o loo faaletonu le vaega lenei ma o nisi lava atunuu ua leai ni faleui.
O le mafuaaga foi lea o le malaga mai i Samoa ina ua feiloai le alii ma le afioga i le Palemia i se fonotaga a Malo Aufaatasi auā ua faaiugafonoina e Malo Aufaatasi le avea o le aso 19 o le masina o Novema o tausaga taitasi e faatāua ai faleese poo faleui, ia poo falelēta‘ua.
O le mau a Mr Toilet ua faasuafa e le afioaga o Falevao ia Tui Falevao, o le atunuu o Iapani o loo pito maualuga lona tulaga i le lalolagi i le fausia o faleese e sili ona matagofie e lē gata o fausaga ae o le teuteuina faamatagofie ua maofa ai tagata asiasi o le lalolagi e afea lea atunuu.
O loo galulue faatasi nei lea Tui Falevao ma le pulega o tagata tafafao faapea le Komiti mo le faamamāina o le taulaga ma aai i nuu ma afioaga, e faalauiloa se fausaga o se faleese i Samoa e teuteuina faamatagofie i laau e fua mai i fugalaau felanulanuai ma matagofie poo le Samoa Garden Toilet.
I se feiloaiga ma tusitala na faaalia ai e Tui Falevao, na ia vaaia tamaitai o le atunuu e ese le lalelei i o latou sei fugalaau, ma o i tonu na mafua ai lana taumafaiga e fausia ni faleese e teuteu faamatagofie i laau o loo ola ma maua i o tatou laufanua.
O loo lagolagoina e le taitai o le Malo lenei taumafaiga auā ua ta‘ua e Tui Falevao poo Mr Toilet, o le a amata i le amataga o lenei tausaga fou le faamoemoe ina ia aulia atu le masina o Setema lea e usuia mai ai i Samoa le fonotele a atunuu laiti o le lalolagi o sui o Malo Aufaatasi, ua iai ni faleese faapea e silasila i ai ma fai ma talaave o Samoa i le lalolagi aemaise o se tala‘iga lelei mo le atinae o tagata tafafao mai i Samoa.
Na taliē le autusitala a o faamatala e Tui Falevao tala a tagata e fai ia te ia ma lana taumafaiga, peitai ua alu alu a ua latou iloa e ese le tāua o lana galuega ma ua avatu ai ma le lagolago. O lea lagolago e lē gata ina sainia ai e atunuu e 193 o le lalolagi le maliega e faatāua se aso e faamamalu ai le tāua o faleese, ae ua faatū ai foi ma le faalapotopotoga a le lalolagi mo faleese lea ua faaigoa o le World Toilet Organisation le WTO.
E pei ona faaalia e lea alii, e tutusa lelei ma mataitusi o le igoa o le faalapotopotoga o fefaatauaiga a le lalolagi le World Trade Organisation poo le WTO.
E faamo‘i le tusitala i le tala‘iga a Tui Falevao ma faafetaia ai lona malaga mai i Samoa, se‘i maua ai se lesona lelei a nisi tagata o le tatou atunuu e pei e ‘ata o se mea mālie le faleese, ae e lē fiafia e fufulu ma teuteu faaaulelei le faleese a lona aiga, auā o mea lava e muamua talanoa i ai tagata e asiasi atu i ni o tatou aiga, o le faleese ma le umukuka sosoo ai loa ma le talanoa pe manaia le fale, ae pe tumamā le aiga i le vaaiga ae pe taugaeleelea ma faainaelo.
