Ua molimauina pea le toatele o suli ma feoi o aiga i Samoa ua soifua a‘e i atunuu i fafo ma ua tala foi gafa o aiga i papalagi ma isi tagatānuu peitai o le soifuaga faasamoa, o le suli lava o le suli, e lē tusiesea pe faasinoesea se tasi pe afai ua tau le gafa i se isi lava aiga pe o se Samoa pe o se afakasi (tulou).
O lea ua tatou molimauina i nei aso ma le talutalu fou o a tatou tu ma aga i fanua ua nonofo isi suli i fafo a o isi foi o loo mau pea le toovae ma nonofo i aiga ma nuu i Samoa, ae o le itu sili ona tāua i le tatou soifuaga ua iai nei, e lē o aveesea le tautua a aiga o nonofo i fafo ma faalavelave fai i Samoa ma e leai lava se aiga o le atunuu e lē o tupu ai lea tulaga.
O le pogai foi lea a oo ina taupule aiga o le a faaee ni suafa e logo suli o i Niu Sila ma Ausetalia poo Amerika foi e malaga mai o le a talanoa le aiga potopoto poo ai nisi ua agavaa e faaee i ai matai auā le faaauauina o le tautua i le nuu ma le aiga i soo se mea fai. O matai foi o le au tausi mea a se aiga auā latou te puipui malu i eleele ma measina e pei o suafa ma isi meatotino.
O le faamoemoe foi lea na a‘e i le tausaga ua mavae i le aiga o le afioga Vaafusuaga Sama‘auga o Faleaseela i Lefaga ia fai ni matai e faaee ai suafa tamalii ma suafa tulafale o lona aiga e pei ona faataunuu i le taeao o le Aso Toonai na te‘a nei 12 o Iulai 2014 i le maota i Mulivai i Faleaseela.
E to‘a sefululima suli o le aiga o le afioga Vaafusuaga na tusi aao i ai le Sa‘o ma le aiga ua lava taoso i itu uma mo le umia o suafa, ma o nisi na malaga mai Niu Sila ma Ausetalia a o isi o loo nonofo i Samoa.
Na faamatala nisi o suafa fou o ni alii talavou mai Niu Sila, e ese le lagona faagaeetia ua latou maua ina ua avatu lea faaaloalo maualuga mo i latou. O nisi o i latou nei sa fesiligia e tasi le latou mau, o se luitau mo le umia o le matai le tautala i le gagana Samoa ona sa ola a‘e i Niu Sila peitai o le isi lea laasaga o lo latou olaga o le a finau i ai, o le a‘oa‘o o le gagana Samoa ina ia suipi mea uma pe a toe foi mai i se taimi i lo latou aiga.
O le itu i meafai a le matai i saoga a aiga i ni faalavelave na faaalia e i latou nei mai fafo o se avega tauave ae e iai lo latou talitonuga e poo le ā lava le mamafatu o ni mea fai e faigofie ona o latou o suli moni e ui ina papa‘e tino ma lē atoatoa le iloa i le gagana Samoa ma le gagana faamatai, ae o le mea e sau i le fatu e iloa ai le tagata e fiafia e fai le tautua mo le aiga ina ia manuia tagata uma ma le nuu.
O matai fou ua faapaia e aofia ai i latou e to‘a sefulu ua umia suafa tamalii.
Patea Aiono Afa‘ese, Patea Jonathan Paulo, Tuiafutea Malili Malu Foini, Tuiafutea Falaniko, Tuiafutea Jared McRobie, Toleafoa Su‘a Sisifo Leaso, Toleafoa Allan Jones, Pauli Sama‘auga, Pauli Atapana, Pauli Pa‘itusi Tina.
O tulafale e toalima e aofia ai: Sagaga Sefo, Sailimalo Aukusitino, Feagaimaalii Satui, Lema Iakopo, ma Sa‘efu Junior. Ia faamanuia le Atua i nofo fou ma ia faagaganaina e le Atua auā le tausiga o aiga ma le nuu.
