O le taeao segisegi na alafai ai le mamalu o le afioaga o Amaile, i le Afio o Mataafa, le susū mai o le Matua o Tauiliili ma le Usoalii, Tama Paa ma Alotutusa o Mataafa ma le Aualuma o Fonoti. O se aso ese le Aso Toonai, le aso 28 o Me 2011.

O se aso ua faamauina ai i le talafaasolopito o le afioaga aemaise foi le Talafaasolopito o lenei Afioaga, na faapaia ma faaee ai le suafa o le Tama Aiga i se tasi o tamā matua o le afioaga, lea na pale mai i le Suafa o Mataafa. O ia lea o le Afioga Tupuola Lui Iosefo. O le suli o Mataafa Iosefo, lē na tofia o le Alii Sili o Samoa i le vaitaimi o le pulega a Siamani.

Talu mai lona tuaa, o lea ua toe oo mai le suafa i Amaile ma ua tasi ai le finagalo o le Aiga Sa Mataafa, e faaee pāpā o le Tama Aiga i lē o loo nafa ma le tausiga o le aiga i totonu o le aiga i le afioaga. I le 81 ai o tausaga o lona soifua, e manino o se tamā lenei ua tele i ai le alofa o le Atua i le umi o lona soifua.

Ae o se vaaiga i lea tamalii i le aso na faatautaia ai le Faafotutupu, e ese foi le malosi, o le lavā onosaia o le uumi o sauniga aemaise o le filemu na vaaia ia te ia i le taimi atoa o le sauniga lotu na faapaia ai lenei laasaga maoae o lona soifua tautua seia oo lava i le taimi na faatautaia ai loa le faaee i ai o pāpā.

O le Afioga Mataafa Tupuola Lui Iosefo ua faaipoipo atu i le afioga i le Masiofo, le Afioga Amelia (Silafa‘i) Mataafa Tupuola Lui Iosefo.

E to‘a 12 o la alo ma o ona mātua o le Afioga Tupuola Atonio ma Laumata Palmer. O lona soifua tautua na molimauina i le taleni na foai i ai e le Atua, o se tufuga faufale.

O se tasi ua tele malumalu ma maota o galuega aemaise foi maota ma laoa o aiga na ia fausia ma o le taleni lea na ta‘ua e ona alo na mafai ona tausi ai le aiga o lenei tamalii ma tautua ai le atunuu i soo se afioaga.

O lona lava soifua na ta‘ua e ona alo o lona aiga i Amaile ae o le vaitau lenei i le matua ai o lona soifua, ua tele lava foi ina malaga i atunuu i fafo i ona alo e asiasi i ai ma faatautaia ai ana siaki masani faaletausaga auā le tausiga o lona soifua maloloina.
O le mamalu i le Aiga Sa le Valasi na faapea ona molimauina le tutū faatasi i le faatautaiga o le Ava faatupu ma faapea ai loa ona faamautu le faaee atu o pāpā i le Afioga Mataafa.

O faamanuiaga na fofogaina e Afioga i Tui Atua Faanofonofo – le Afioga Tafua Maluelue Tafua ma le Afioga Fuataga Kasimani Lautusi, ae lē gata i lea mai i le Afioga Fiame Naomi Mataafa, ma o faamanuiaga ina ia alofa le Atua e filemu ma fiafia lenei nofo i le pale mai ai o le Afioga i le Tama Aiga aemaise i le Masiofo.

Na gata le Mataafa o lea itu o le Aiga i le afioga Mataafa Iosefo, na sosoo ai ma le seei i le suafa o le Afioga Mataafa Faumuina Fiame Mulinuu lea na tulai mai i le tofi Palemia muamua o le Malo o Samoa.

O ia foi lea o le tuaa o le Afioga i le Minisita o Faamasinoga le Afioga Fiame Naomi Mataafa. Na maliu le Afioga Mataafa Fiame Faumuina Mulinuu ae seei ane le Afioga Mataafa Faasuamale‘aui Patu i le suafa, ma o ia lea na tulai mai e avea ma se tasi o Sui o le Fono a Sui Tofia – lea e seei ai Tama Aiga o Samoa.

Ua silia i le 10 tausaga talu ona tuua le Malo e le Afioga Mataafa Faasuamale‘aui, ae o lea la ua toe foi mai i Amaile le suafa ma ua pale mai ai loa le Afioga Mataafa Tupuola Lui Iosefo.

Comments

comments