E tele tausaga o tautua le susuga ia Api Neru mai le afioga o Salelavalu i Savaii ile aulakapi ale afioga o Laulii i totonu o Aukilani, ua le gata ile tele o tausaga o avea ma tama taalo ole ‘au, ae o tausaga foi na avea ai ma faiaoga lagolago i totonu ole aulakapi lenei a Laulii. Ole tausaga lenei na tofia loa ele komiti faafoe, ale aulakapi e see mai e tauaveina le tofi faiaoga ulu ole ‘au mo le taimi muamua.
Lea la sa avea ai loa ma faiaoga ale aulakapi ale Liona a Laulii ile taamilosaga ale Aukilani Samoa i lenei tausaga. Talu ai ole maoa’e ole finau ma le saili malo ole ‘au lenei ale Liona ile taamilosaga ale Aukilani Samoa ma ua faafiafiaina ai le tapuaiga ale nuu, aemaise ole ‘au atoa, e pei ona latou umia ai le Siamupini ale taamilosaga 15 ma le taamilosaga taitoafitu, lea na a’e ai loa se tofa ma le moe ile pulega ole ‘au lenei a Laulii poo nisi foi o matai oloo faamalumalu ma taulamua ile taitaiina ole ‘au, ua tatau ona fai se meaalofa ale ‘au ma le nuu i lea alo ole atunuu i lana tautua i totonu ole ‘au ale afioaga.
Ole finagalo autasi o matai oloo taitaiina le ‘au, e tatau ona avatu se suafa matai ole afioaga o Laulii e faasuafa ai le susuga ia Api Neru, auā ua afu lana tautua i totonu ole ‘au, ae ua avea foi ose tamafanau moni a Laulii i lona tulai mai ile taumafaiga ole aulakapi i lenei tausaga lea ua seei mai ai Laulii i luga ole tumutumu mauga ile taamilosaga ale Aukilani Samoa.
Ole po ole Aso Toonai ua mavae 18 o Novema na tumutumu ai le kalapu ale Aukilani Samoa i Otahuhu i aiga o tama taaalo, o uo ma ē masani aemaise o tamafanau ole afioaga o Laulii, e molimauina le tapaina ole ipu ole suafa matai ole susuga ia Api Neru e pei ona faaeeina atu iai le suafa matai Malufautamalelagi ose tasi o suafa matai alii ile aiga Salevalasi i totonu o Laulii. Ose meaalofa ale nuu o Laulii i lea alo ole atunuu e talimasineia ai lana tautua matavela i totonu ole aualakapi ale Liona e pei ona galue ai ile tele o tausaga. Ole susuga ile faafeagaiga ia Rev Mafutaga Faaleaoga ole ekalesia EFKS Kanana Fou i Manukau sa ia taitaiina le sauniga lotu i lea afiafi.
Ole maualuga ma le matagofie ole po ona sa auai le peresetene ole Aukilani Samoa le afioga ia Aiolupotea John Roache faapea le alii pule ole falekalapu ole Orator le susuga ia Ben Vili ma le faletua ia Teuila, ole sui ole faletaavale ole G-Mana ma nisi o tamalii ole afioaga o Laulii. Ole afioga ia Fuamatu Nuuve’a ose tasi o Sa’o ole aiga Sa-Fuamatu i Aukilani, na saunoa e faamanino vaega uma ole suafa lenei e pei ona ioeina mai e matai ole aiga i Samoa aemaise ole resitalaina ole suafa i Samoa ise taimi oi luma.
Ole po foi lea sa faataunuuina ai ma le tufatufaina o faailoga mo tama taaalo ole ‘au, e pei ona tauaaoina iai nai seleni mo i latou e 41 sa tautuaina le aulakapi ale Liona i lenei tausaga. O nisi o faailoga faapitoa e pei ole tama taalo ole tausaga ile taamilosaga ole 15, na manumalo ai le susuga ia Telefoni Iakopo, lea sa lagolagoina ele susuga ia Ben ma le faletua ia Teuila ole Orator, ae ole tama taalo ole taitoafitu na manumalo ai le susuga ia Desma Lia’ina, lagolagoina ele susuga ia Paauli ma le fale kalapu ole Fiafia.
Nisi o faailoga
Sportsmanship maua lea e Peti Tuisavusa, tama laititi ole tausaga na maua e Alex Tavita, tama taalo alualu i luma lona taumafai ile laina i tua ole taamilosaga 15 na maua e Lino Tiatia, tama taalo ole laina i tua ile 15 na maua e Patrick Lepua, tama taalo alualu i luma lona taumafai ile laina i luma na maua e Faapopo Faapopo, ma le tama taalo ole tausaga ile laina lava i luma na maua lea e Junior Faifua.
Taitoafitu
Ole susuga ia George Chricton na mauaina le faailoga ole tama taalo ole laina i luma, ae ole susuga ia Vavao Afemai na mauaina le tama taalo ole laina i tua.
Ole tama matua ia Tuautu Iosefa sa fai ma sui ole afioaga o Laulii i Niu Sila nei aemaise ole auvalaaulia e faafetaia le taumafaiga ale aulakapi ale Liona i lenei tausaga e pei ona latou faaeaeaina ai le igoa ole nuu i totonu o Aukilani e ala i faagatama ole lakapi.
