E toaono suli ole aiga ua atofa ole a faaeeina atu iai le suafa Anauli i Tanugamanono ile Aso Gafua, 1 Novema 2016. Ile faatalanoaga ma le susuga Malofou Muavae le isi lea o alo ole aiga Sa Anauli ua tofi ile suafa, sa masani a‘i e tasi lava le tagata e umia le suafa ole latou aiga.
Peitai ua faasafua ai nei i suli ole aiga ma ua ose tulaga foi lea e faafetai ai e ia le faamoemoe, ona o lona agaga maualuga, ina ia maua e suli uma ole suafa le nofo fealofani.
Ole toaono lea ua fuafua mo nofo, ole toatolu mai Ausetalia ma le toatolu o latou mai Niu Sila. E atagia ile talanoa a Malo, ole toeaina o Anauli Muavae na fanaua le tamaitai o Pa‘ilua Anauli, o Pa‘ilua lena na fanau mai ai Anauli Muavae II, e fanaua Malofou.
Ole susuga Malofou na soifua ane i Tanugamanono ile aso 12 o Ianuari 1962, ae mulimuli ane malaga atu i Niu Sila ma nofomau ai e oo mai ile taimi nei.
Ole Aso Faraile na taunuu ai i fanua mo le tapenaga ole saofai. Ole aumalaga e aofia ai ona tuafāfine e toalua o Selu ma Pepe Anauli, o lana fanau tama e toalua, Selwin ma Shaun, ma le faletua, ia Lillian Motu. Na talanoa Malo, e lei iai sona manatu e tofia ia e fai sona matai, ona o ia lava e laititi ile fanau a lona tina.
O ona moomooga e maimau pe ana soifua mai pea si ona tamā e ana le aiga ma le suafa lea ua ia pale ai. Na toe usugafa le toeaina ile tamaitai Asau, ole alo o Fao ma maliu ai i lona 89 o tausaga i Asau.
Ole taeao ole Aso Gafua na faataunuuina ai le faamoemoe e pei ona usu faaaloalo ai le afioaga o Tanugamanono, auā le afio ile Usoalii faapea i laua o Matua, susū Alo ole Malietoa faapea le Faletolu mai le Vainalepa.
Ose aso mamalu ma le matagofie na molimauina ai le moni ole saafi ale Tusi Paia, ‘se mea lava ina a lelei ole nonofo faatasi o uso.’
Ole tofa na a‘e i feoi ma suli o e suafa, o lea ua faamamalu ele afioaga ma faamanuia iai le Atua e ala i lana Aufaigaluega Paia sa faapaiaina nofo. Ua moni ai le upu, ‘ole faamoemoe ua taunuu ole laau lea ole soifua.’
E lei faatamala feoi ole suafa Anauli i piuga ma faaaloaloga auā Aiga faapea le Faletolu ma le Vainalepa, aemaise Samoa na potopoto ona ole faamoemoe.
