O se mitamitaga i mātua ma aiga pe afai e filifilia se tasi o fanau i se aulakapi faapolofesa e pei o le supa sefululima e pei o le alii talavou ia Michael Alaalatoa o le Waratahs.
O le taaloga talu ai ma Otago na sui atu ai i totonu Michael mo lana taaloga muamua mo NSW. Ae peitai mo le afioga Gisa Vili Alaalatoa ua lē na o le atalii ia Michael ua faamanuiaina ae ua faapea foi le isi ona atalii laiitiiti ia Allan lea foi ua filifili mo le Brumbies.
I se faatalanoaga a Gisa ma tusitala i Sini nei na ia faailoa ai le tuualalo masani a o laiti nai ona alo, “O le aoga lava e muamua sosoo ai loa le lakapi.” Na ia faailoa ia Michael ma Allan i lo la talavou mai, o le lakapi e masalo e na o le sefulu tausaga e ono taalo ai ae a lavea loa ma faamuta le olaga taalo e tatau ona iai se matafaioi e tua i ai.
O le alii o Michael e lē gata o le filifilia mo le Waratahs a o lea ua faauu mai foi i le Iunivesite ma lona faailoga faafaiaoga. O le alii o Allan lea e taalo mo le Brumbies ma ua sauni atu nei e fetaui ma lona uso o Michael pe a taaalo le Waratahs ma le Brumbies i le vaiaso nei i Semifinals o le supa sefululima.
Ua faaopoopo atu nei o la suafa i le lisi o tama Samoa o loo iai nei aulakapi a Ausetalia. E lē gata i le tauleleia ai o la mātua ma aiga faapea Samoa.
Ua fai i laua ma faataitaiga lelei mo tupulaga aemaise o le faaluaina ai o le taalo a lo la tama ia Gisa Vili mo le Manu Samoa faapea lo la uncle ia Palemia Alaalatoa
