Faaeaina le maelega faaauau

Ua malie le papa i galagala, ua malie le papa o le faatolotologatama, ua malie o ma faasao, sa o sa o ua faafetai tele ma faamanu atu i le Atua tali mana’o aua ua ia talia ma aumai le tali o le faatogamamate atu i lona alofaina auā ua ausagaletuvale le taumafaiga ma le tauiviga a le atalii, le susuga ia Love Muese Fenunuti Ioane, ina ua faamanuiaina ana aoaoga ma ua ausia le faailoga o le Master of Business (Accounting) mai le Iunivesite o Aukilani (AUT).

O le afiafi o le Aso Faraile na faataunuuina ai le faauuga a le Iunivesite mo alo ma fanau sa gapatia ma tauiviina mataupu eseese e tusa ma a latou tofa mamao, ma sa maitauina ai foi le toatele o tamafanau a si o tatou atunuu na faauu mai ai, e pei la o le susuga ia Love Muese Fenunuti Lilo Ioane.

O le afiafi o le Aso Toonai na faapotopoto ai le aiga o Love Muese ma na latou faamamafaina ai le faia o le viiga ma momoli atu ai lagona meemee ma le agaga fiafia e faafetaia ai le alofa ma le agalelei o le Atua, auā ua tau lau o le faamoemoe o le atalii. E lē fou lea laasaga i le soifua tauivi o le susuga ia Love Muese auā o lona faauuga lona tolu lea.

O lona uiga o loo faagasolo pea le maelega alualu o le atalii seia oo lava ina tini i le laasaga o loo faamemelo i ai lona faamoemoe. Ua mae‘a ona ia ausia ma tauaaoina faailoga o le Bachelor (Accountig), Postgraduate (Accounting) a o lea ua iai nei ma le Master o lona uiga o loo iai pea se isi laasaga mo le faaatoaina o lenei moemitiga e pei ona saunoa lou tuaa le susuga i le faifeau, Susuga Rev. Savali Fenunuti Ioane.

“E toeitiiti ona e tini lea” o lana faamamafa lea ma na faalauteleina ai le faamalosiau atu ina ia tumau pea le loto ma le lagona fia sailiili ina ia tau i le tini lou faamoemoe. O Love Muese ua lē gata ina ua faamanuiaina i lona faailoga ua tauaaoina ae ua faapena foi na ia maua le avanoa e faigaluega i Samoa mo le faaaogāina ai o le taleni faasuetusi e pei ona iai nei lona tomai ma lona agavaa.

Saunoa foi le faifeau, Susuga Savali Fenunuti Ioane o se faamanuiaga le ausia e se tasi o le fanau o se faailoga maualuga faapea, ma o fua faaaliali ia o le galuega faaauau a mātua aemaise o le loto ma le agaga e faamoemoe lava i le Atua e mafai ai e fanau ona ausia nei laasaga o le ola tauivi.

Ia o faamanuiaga ma alofaaga mo oe le atalii Love Muese Fenunuti Lilo Ioane, malo le onosai, malo lototele, malo le tauivi ma le finau, faafetai le faaea aiga aemaise le tali manao auā o le tama poto e faafiafiaina le tamā, mātua ma le aiga.

Ia manuia ou laasaga uma i lou feagai ai ma lau galuega i Samoa aemaise o au fuafuaga mo le faatiniina o lou faamoemoe i se taimi o i luma. Faamanuiaga ma moomooga alofa mo oe mai ou aiga uma lava i soo se vaega o le kelope, o nai ou tuaa aemaise o le tapuaigamau a nai ou mātua matutua i Aotearoa nei.

Le alii o Love ma ona mātua