Faaeaina e Corina McAuley High School ma lona Aiga

Corina Vai ma lona faiaoga i le Gagana Samoa i McAuley, Tauanuu Perenise Tapu
Corina Vai ma lona faiaoga i le Gagana Samoa i McAuley, Tauanuu Perenise Tapu

Ua faalauiloaina aloaia nei alo ma fanau na faamanuiaina i suega o le sikolasipi NCEA i le tausaga na tea nei. O lea faamoemoe sa faia lea i le maota o le Palemene i Ueligitone i le vaiaso na tea nei ma sa tufatufaina ai faailoga mo fanau e 35 e sili aoao i mataupu eseese o le NCEA lea e lavea ai ma le gagana Samoa.

O le tamaitai ia Corina Vai mai le aoga a McAuley High School ua sili aoao nei i le gagana Samoa ma sa auai atu ai i lea foi tufatufaga faailoga faatasi ai ma lona tuaa ia Kitiona Nanai Vai faapea le pule aoga o lea aoga maualuga.

O se faailoga ua ausia e lea tamaitai o loo siitia maualuga ai pea le aoaoina o le gagana Samoa i totonu o le aoga a McAuley faapea le siitia ma le faaeaea ai o lona aiga o loo tu‘i le mulipapaga ma tapuaia aoga. Ua taunuu ai le upu o le tama poto e fiafia ai le tamā a o le tama valea e faanoanoa ai le tina.

O le suega o le sikolasipi o le NCEA e lē mafai ona sue uma tamaiti o le Form 7 ae na o tamaiti e filifilia lea mataupu e sue uma le Level 3 i le NCEA Level 3 ona filifili mai ai lea o tamaiti i mataupu taitasi e sue ai i le sikolasipi.

E 83 tamaiti sikolasipi i Niu Sila atoa sa sue i le mataupu o le Gagana Samoa i le tausaga ua tea nei ae toaiva sa maua a latou sikolasipi e fua i tamaiti ia sa sue ma o lea fuainumera o lo mafuli i aoga i Aukilani.

O le tamaitai ia Corina Vai ua ia mauaina le top scholarship o le gagana Samoa i aoga nei e iva ma ua toe ausia ai e le aoga maualuga a McAuley High School se isi avanoa e maua ai lea avanoa mo fanau sikolasipi e pei ona maua e isi aoga i tausaga ua mavae.

O le aoga maualuga lenei a McAuley na latou mauaina muamua lenei faamanuiaga sikolasipi maualuga ina ua faatoa amata ona sue le Gagana Samoa i le sikolasipi a o lea faatoa toe ausia lea e se tamaitiiti aoga lenei avanoa e pei ona tulai mai ai le tamaitai ia Corina Vai.

O le agaga fiafia o le susuga i le faiaoga o le Gagana Samoa ia Tauanuu Perenise Tapu, o loo ia faamalosia ai pea le alu o malaga a le aoga faatasi ai ma aso o le gagana Samoa lea e tailua tausaga ma faatino. Ma o ia vaega uma o loo taumafai e tulei ai vaega o loo faatinoina i le aganuu aemaise lava i fanau ia o loo lelei le tautala i le gagana Samoa.

Corina Vai ma si ona tuaa, Kitiona Nanai Va
Corina Vai ma si ona tuaa, Kitiona Nanai Va

O Corina o le alo o le susuga i le aoao ia Kitiona Nanai Vai mai Matautu Falelatai ma le faletua ia Quaki Lee Vai o le afioaga o Solosolo.

Na fanau i Samoa ona malaga mai lea i le tausaga 1999. O loo ia fuafua e alu i le kuata fou i le Iunivesete o Aukilani e ave le Gagana Samoa ma sue sona faailoga i mataupu tau taaloga.

Ina ua fesiligia i le ala o le faamalosi o lona iloa i le tatou gagana, fai mai a ia, O le tautala lava i le faasamoa i le fale, mea e fai i le aoga Aso Sa, autalavou ma le ekalesia. Sau loa i McAuley e matuā telē le isi fesoasoani na maua mai ai.

Na lauga i felafolafoaiga a aoga maualuluga, o le ‘ava o le feiloaiga i le soo a McAuley ma le auatalavou a Manase aemaise o meafai a le aoga. E tele ni luitau na tuuina e le faiaoga ia i latou ae sa taumafai lava ma faamoemoe i le Atua.

Ae o le feau foi lea mo fanau Samoa i nei aso. Ia manatua le gagana Samoa ne‘i vale tuulima le ta aganuu. Fai mai le tasi upu, A leai se gagana ua leai se aganuu, A leai se aganuu ua po le nuu.