Ale Halo ma Polu Milford, o tuaa o Anthony Milford faatasi ma le faiaoga ale Bronces o Wayne Bennet ile aso na faalauiloa ai le Anthony Milford’s Board a St Marks

Ale Halo ma Polu Milford, o tuaa o Anthony Milford faatasi ma le faiaoga ale Bronces o Wayne Bennet ile aso na faalauiloa ai le Anthony Milford’s Board a St Marks

Na ala usu fiafia Anthony Milford ma nai ona tuaa e sauni atu se’i tali le valaaulia ale A’oga a St Marks Primary ile pitonuu o Inala. Na manatu tuaa o Anthony, susuga ia Ale Halo ma le faletua ia Polu Milford, ose valaaulia faapitoa osi o la alo mai le St Marks Primary School, e nate tauaaoina se faaailoga ale A’oga ile latou Assembly masani peitai, na faateia i latou ile taunuu atu ae fesiligia poo fea le isi vaega ole auaiga.

Na faatumulia le lotoā ale a’oga ile toatele faapea ma le Head Coach ale Brisbane Broncos NRL, le susuga ia Wayne Bennet. Ai ole mea tonu a lea e ta’u ole matuai “Surprise” moni lava.

O lea lava taeao, Aso Faraile aso 2 o Fepuari, 2018 na auai mai ai foi ma sui mai nisi o faalapotopotoga sa auai le alii lauiloa ile lakapi liki, le susuga ia Anthony Milford tainane o sui mai nisi A’oga sa iai e pei o St Peter Clairvaux Mackillop College.

Na faatumulia le A’oga i lea taeao i tagata eseese faapea tamaiti aoga ma faiaoga auā e filogia le A’oga. Ose tasi lea o A’oga e ova atu ile 500 ma ona tupu tamaiti o a’oa’oina ai. Na aloaia le faafeiloaiga faapitoa ale fofoga ole aso e faafeiloai ai malo faaaloalogia aemaise le alii taalo ia Anthony Milford ma nai ona mātua ma se vaega ole aiga sa auai atu.

Ua a’e se finagalo ile A’oga e faatāua lenei alo lauiloa ile lakapi, ma avea ai o ia ose lu’itau i alo ma fanau tuputupu a’e i totonu ole aoga. Na o latou tapenaina se talita tumau e tuu ile A’oga, ua faaaigoaina ole “Anthony Milford Sports Board.”

O lea tulaga ua faia nei, e fuafua mo tamaiti e faamanuiaina ma talenia i tulaga tau taaloga ole a tusia o latou igoa ma faapipii o latou ata ile laupapa lea, ole Anthony Milford Sports Board. Ua talafeagai lea faaeaea e teufatu i manatu o tamaiti aemaise o Anthony, ose tamafanau ale pitonuu o Inala. Ole lotu foi lea ale ekalesia Katoliko ile Palisi a St Mark oloo tapuai ai Anthony ma nai ona mātua ma le aiga atoa. O lea foi taeao na lologo le aofia a’o saunoa le faiaoga ole Aulakapi ale Broncos e saafi lona agaga fiafia e toe faaailoa pea le soifua taalo o Anthony ile lakapi liki.  Na ia saunoa fiafia e molimau mo Anthony, o ia lava ose tama e agamalu, amio faaaloalo, galue malosi ma filemu, ma oloo finau malosi ma tauivi pea ina ia tini lana miti ile iuga ole tulaga tau taaloga ole lakapi.

Ua selau pasene le atoatoa ole malosi ole alii taalo lauiloa ale Broncos ia Anthony e faasauni atu mo taaloga ile masina o Mati e pei ona pisi ai i ana toleniga i lenei vaitaimi.