Ole Isaia 60:1 ole Tusi autu lea sa fai ma avefeau poo se manatu autu ile Koneferenisi a tina Pasefika ua faaigoaina ole Arise Shine lea sa usuia i aso e lua Aso Faraile ma le Aso Toonai ile faaiuga ole vaiaso ua mavae.
Ole itula e 1:00pm ile aoauli ole Aso Faraile na amata ulufale ai lenei fono ile Ekalesia Victory Convention Centre i Aukilani, ae faamae‘a ile afiafi ole Aso Toonai.
Ole manulauti o lenei fonotaga ia faamalosia ma faaaupegaina tina ole Pasefika i lo latou faamoemoe, ola faatuatua male aafiaga ole isi uso a tino i totonu ole lio o tina.
O lenei polokalame faaleagaga na tuufaatasia lea ele Pacific Womens Christian Association.
O failauga faapitoa mai Colorado Spring i Amerika ia Dr Tamara Winslow o ia foi na faavaeina mai le Institutes for Biblical Truth na laugaina le afioga ale Atua aua lava le faamalosia o le valaauina o tina.
Ole Aso Faraile na tatalaina le faamoemoe ile faatalanoaina o fesili ma tali, ma sa valaaulia ai tina mai siosiomaga eseese e molimauina lo latou sao e pei ona valaauina ai i totonu o aiga, ma ekalesia aemaise o galuega oloo galulue ai.
Ma o lenei faatalatalanoaga na auai sui o tina mai le vaega o musika ma faafiafiaga, tina mai le vaega o pisinisi, sui o tina i totonu o ekalesia, tina oloo i totonu ole lio o ofisa faasalalau, tina mai le vaega o aoga, sui o aiga, faapea tina oloo i totonu o faigaupufai a malo.
E ui e tele vaega eseese oloo valaauina taitasi ai nei tina, ae tasi lava le itu na tatai iai o latou finagalo faaalia, ole faamalosia lea o loto o tina uma ole Pasefika, ia avea i latou oni taitai e manuia ai le malo ole Atua, poo le avea o ia ma malamalama e fai ma sulu ile savaliga faaletina.
Na mae‘a le faatalatalanoaga ile aoauli lea ona sosoo lea male sauniga lotu ile afiafi.
Na toe faaauau polokalame masani ile Aso Toonai ile aoauli ma faamae‘a ai loa le koneferenisi lenei mo tina ile sauniga lotu foi ile afiafi.
Ma ose mafutaga mafana male faamanuiaina ai o loto o tina ile tāua ole tiute o tina i totonu o aiga ma ekalesia, ae sili ai le tina e tumau lona loto ile Atua ile ola faatuatua male ola tolitonu.
Ose koneferenisi muamua lea ua usuia faapitoa mo tina Pasefika ae ua maitauina ai le loto fiafia male olioli i tina sa auai ile faaaupegaina o i latou mole malo ole Atua.
