Saoasaoa le faaatauina o le Vaega-2 o le Tautoga Gausia
E lē toe tuu avanoa, ae o le a tuusa‘o loa i leoleo ma le tulafono i latou o loo faaosoosoina pea i tuinanauga leaga, ma le matapeapea, o le gaoi ma le faomea, mafua ai le solitulafono. O le saunoaga manino lea a le tamaitai pule o le ata tifaga ma le kamupani Pue Ata mo le Tautoga Gausia.
O loo toatele pea le mamalu o le atunuu, o loo manatu māmā ma faataligatuli i le alagaina pea ma lapataia i le solitulafono o le kopi faagaoi ma tipi faananā ata i luga o DVD, atoa ma pese i luga o CD. Atonu pe lē o le lē lava foi o le itu tau i le a‘oa‘oina, ma le moni o le soifua faakerisiano o loo faatalaleleiina ai.
Ua lē mapu i luga o nusipepa, ma leitio e ala i pesega ma fatuga a le au fatupese, le tele o tala ma lapataiga mo i latou o loo fiafia pea e faia lea tulaga maualalo ma le solitulafono matagā o le gaoi ma le faomea.
E ui i le mau lapataiga ma fautuaga i auala eseese o loo momoli ai lea feau mo tagata lautele ona o le mataupu i faiga faapea, peitai e aliali mai, o loo laaloa ma lē kea i ai nisi lava tagata Samoa, ma faaauau ai pea ona faia le agasala ma le solitulafono.
O le vaiaso na tea nei, na faalauiloa ai faalauaitele e le tamaitai pule o le ata tifaga Tautoga Gausia i luga o le Radio Samoa, nisi o tamaiti aoga o se aoga i Aukilani i Saute, sa mauaina o faatauina kopi o le ata i lona vaega lua.
E tusa ai ma le finagalo faaalia o Taufau Gardenia Aukuso, e lei faateia i le tulai mai o lea tulaga, auā e lē o se taimi muamua foi lea ua tupu ai. O le vaega muamua o le ata tifaga, sa maua ai ma faamaonia se tasi o tamā Samoa e alaala i Magele, ae faigaluega i le kamupani a le Fisher & Paykel i East Tamaki, ua leva ona ia faia lea solitulafono.
Peitai o le toe tulai mai o lenei faafitauli i tagata Samoa lava, o se fafagu lea o le a toe tagatagai toto‘a i ai, e tusa ma le faaiuga sa faia muamua.
O le taimi muamua, sa tuu avanoa le tamaitai pule ma le pulega o le kamupani pueata, ma faaaogāina ai le va fealoaloai ma le ava fatafata e soalupule ai le faafitauli. Peitai o le faaauau pea ma le lē logosaia e tagata o le mataupu o le faia faagaoi o kopi, e foliga mai ai o le a tuusa‘o loa i leoleo ma le tulafono mo se fesoasoani.
O tama ma teine aoga o le aoga i Aukilani i Saute sa latou faatauina le vaega lua o le Tautoga Gausia, i se tau taugofie tele, ma o se tulaga ua matuā faaleagaina ai le maketiina o le ata i le va ma tagata faatau.
Saunoa Taufau, e alofa tele i le toatele o tamā ma tina matutua o le atunuu, faapea i latou o loo agai mamao atu lava i le faleoloa ma faatau le ata i le tulaga masani, ma lona tau o loo faatauina ai. Ae a fua ia i latou o loo faia lea agasala, ua lē talafeagai tele ma ua faanoanoa tele ai.
E tusa ai ma lipoti sa mauaina e le pulega o le fale pueata ma le kamupani e ona le ata tifaga, sa ta‘ua ai e lē na o tama ma teine aoga, peitai o loo aafia ai ma mātua o i latou i le faia o le solitulafono. E iai foi le aafiaga o le aoga i le tulafono, pe afai e faamaonia tamaiti aoga ma le solitulafono o loo faia.
Sa tautino foi Taufau, e lē gata i tamaiti aoga e pei ona lipotia, ae ua oo atu foi nisi faamatalaga o loo ta‘ua ai nisi o aiga o loo kopi, ma tufa i aiga ma uo i totonu o le ekalesia, e ave fua nisi ae faatau isi.
O le toe tatalo a le tamaitai pule, sa ia toe augani ai i le atunuu, ma soo se tasi lava o faia lea tulaga, poo se isi foi o fuafua e faia le solitulafono, e sili ona tuu loa ma aua le toe faia. O le a lē toe alofia ma toe tuu avanoa i soo se tasi lava o le a toe maua ma faamaonia le faia o le gaoi ma le faomea, ae o le ‘afu lava o leoleo ma le tulafono.
E moni e lē faigofie le galuega sa faia ma tuufaatasia ona o le naunau i le silasila ma le maimoaga a le atunuu, peitai o le faamatapoto, ma le lē popoi o nisi, o le a avea ma auala e lē atoatoa ai le auaunaga ma le tautua.
O loo faagasolosolo pea sailiiliga ma suesuega a leoleo ma le pulega o le ata tifaga Tautoga Gausia, ia i latou ua mauaina, atoa ai ma le isi foi vaega e pei ona lipotia ma ua taofia o latou faamatalaga e le ofisa i le taimi nei.
Saoasaoa le faatauina o le vaega lua o le Tautoga Gausia
Ua faamaonia foi e Taufau, le tulaga lelei ma le vave tele o le faatauina o le vaega lua o le ata tifaga. O le aso lava na faato‘ā faatauina ai i tua le ata, sa molimauina ai le saoasaoa tele pe a faatusatusa i le faatauina o le vaega muamua.
Saunoa foi le tamaitai pule, sa tele se a‘oa‘oga talu mai le taimi muamua, ma le faatauina o le uluai vaega o le ata. O le faafitauli sa tulai muamua, o le lei lava o kopi sa tapenaina ona o le toatele ma le manaomia.
O le vaega lua, e ui lava ina toatele ma televave le faatauina, peitai sa leai se faafitauli pe na poloka, ona o le tele ma le lava saunia o kopi sa tapenaina e tali ane ai i manaoga o le mamalu o tagata faatau.
E oo mai i le taimi nei, e lē o mapu le aufaigaluega i le tipiina ma le tapenaina o ata fou, ona o le manaomia tele ma faatupulaia o le au faatau. E lē gata i Aukilani ma Niu Sila lava ia, ae faapea foi i Ausetalia ma fafo atu.
O se avanoa foi e toe faafetaia ai le mamalu o le atunuu, ma le au faatau, ona o le lagolagoina o le taumafaiga o le Tautoga Gausia e ala i le faatau. O le a mafai ma faigofie ona faagaioia nisi auaunaga ma toe pueina nisi ata tifaga, ona o le lagolago a le toatele, ma le faaaogāina o le auaunaga e pei ona saunoa i ai Taufau Gardenia Aukuso.
