E lei mae‘a lava le faagasologa o mataupu faasaga i le feeseeseaiga a le afioaga o Solosolo. O lea foi na valaau i luma o le faamasinoga i le vaiaso na tea nei ma ua toe tuu mai i le vaiaso nei e toe iloilo ai foi nisi o moliaga fou.
O le fuafuaga o le faaleleiga lea na faatautaia i le afioaga, o le oo mai lea o le afioaga poo le pulega a Alii ma Faipule o le faiganuu tele ina ia faamanino ua iai le faaleleiga ma ua manatu loa e toe faaui i tua tagi e aofia ai nisi o moliaga fou na faia faasaga i nisi o matai o le afioaga e lei usitaia le Poloaiga a le Faamasinoga lea na tuu mai i le amataga o le tausaga ina ia toe foi ai i totonu o le faiga nuu tele ma toe osi lelei le nuu o Solosolo.
O le faatinoga la o le faaleleiga lea ua faamaonia ai lo latou manaoga ina ia usitaia le poloaiga a le Faamasinoga, peitai o nisi ua mafai ona faaui i tua tagi na faia faasaga ia i latou ae o isi o loo faaauau pea a latou mataupu i le vaiaso fou e pei ona fofogaina e le Faamasinoga Faaitumalo i le vaiaso na tea nei.
I le toe valaau ai o lea mataupu i luma o le Faamasinoga i le amataga o le vaiaso mo se faaiuga, sa lē mafai foi ona auai le afioga ia Leota Leuluaialii Ituau Ale, lea e faapea o ia sa taitaia lea faiga nuu laititi i totonu o Solosolo. O ia foi lea e lei talia lava e Solosolo e toe foi atu i le faiganuu tele lea ua mautu nei.
O se tasi o tulaga o loo fesiligia pea e le afioaga ona na faaalia manino foi i luma o le Faamasinoga e Leauvaasa Afa, o le sui o alii ma faipule o Solosolo, e lei tulai lava Leota i taimi e valaauina ai lea mataupu ma e faapea foi i le tausaga na tea nei.
“Ua manatu foi alii ma faipule o Solosolo mo le faia o se loia e fesoasoani i mataupu a le afioaga,” o se saunoaga lea a Leauvaasa.
Ae peitai, na ta‘ua i tolaulauga a le itu a leoleo, ua lē mafai ona auai Leota ona e lei oo i ai lona tusi samania ona e lē o maua poo fea tonu o loo alaala ai.
O loo faaauau pea le faamagaloga a le afioaga mo le faaui i tua o tagi e faasaga i ē o loo molia i lea mataupu ma na faaalia foi e Leauvaasa, ua mae‘a faaleleiga a le afioaga ma ua tuuina atu foi le tusi na faia ai se sainigalima a le afioaga ma ē o loo molia i le Ofisa o le Komesina o leoleo.
Na toe fautuaina e le afioga i le Faamasino, Mata Tuatagaloa, alii ma faipule o Solosolo e tatau ona feutagai ma le resitara o fanua ma suafa ma tuuina atu i ai se kopi o le sainigalima ae lē o le Ofisa o le Komesina o leoleo e pei ona ta‘ua e Leau i lana talosaga ona e lē o faamaonia i luma o le faamasinoga le faia o le sainigalima a le afioaga.
Ua mafua lea tulaga ona na mae‘a le sainigalima ona ave lea e le afioaga i le Komesina o Leoleo. O le faamatalaga a le tamaitai Faamasino, e tatau ona aumai le maliega lea e faamaonia atu ai e le Faamasinoga ae lē o le Ofisa o Leoleo.
Na faaalia foi e Mata, e lei tuuina atu ni tali a ē o loo molia i lea mataupu, ma na ta‘ua e le sui o i latou o loo molia, ua mae‘a ona ioeina e i latou ia moliaga ae peitai ua toe faamanino mai lea tulaga e le Faamasino, ona o moliaga na latou ioeina ua mae‘a ona faaui i tua e le Faamasinoga, ae o moliaga foi lea e lei tuuina atu ai sa latou tali.
O le vaiaso lenei i le Aso Lua (taimi Samoa) o le a faapea ona toe valaau ai foi lenei mataupu. O le faaleleiga e na o le toatasi lava le matai – Leota Leuluaialii e lei talia lona oo atu i le faaleleiga.
Ua tele foi la finauga ua alu i luga o ofisa faasalalau e faatatau i le lē talia e Solosolo o le taumafaiga a Leota Leuluaialii e usitaia le poloaiga ua avatu e le Faamasinoga, ae e foliga mai e lē o maluelue lava alii ma faipule o Solosolo i lo latou manatu, e lē toe talia lea tamalii i totonu o faiganuu a le afioaga.
O le latou mau ua avea lenei matai ma faafitauli tele ia Solosolo ma ua tele taimi ua ia faia ai gaioiga ua mafai ai ona tuuaia ua “aaitui i le afioaga”. O lea la e tālia i le vaiaso lenei pe faamata e talia e le Faamasinoga le faaiuga lea ua tamau ai Solosolo.
