Ua savali nei i le fitu tausaga talu ona faatino pea lenei galuega feasoasoani ma le soosoo tau‘au a le faapotopotoga o le Servolution i le atunuu mo i latou o loo lima vaivai ma utiuti le faasoa.
O lenei polokalame o loo galulue faatasi ai nisi o faafeagaiga ma autalavou mai isi ekalesia faatasi ai ma le ofisa mamalu o leoleo i totonu o Aukilani nei.
O le Aso Tofi na toe amata ai lenei galuega alofa ma le fesoasoani i le komiuniti i totonu o Manurewa. Na tumutumu le ekalesia o le Life Church i Manurewa i tagata eseese na agai atu ma molimau ma talia lenei faamanuiaga e pei ona faatinoina i tausaga taitasi.
E tolu aso o lenei faamoemoe. O le Aso Tofi na amata ai i le moaina o vao i aiga faatasi ai ma le taalaoina o le lapisi i totonu lava o Manurewa. Ae o le Aso Faraile na faagasolo ai loa plokalame i le malumalu o le Life Church i le faafugaina o ao o alii, o le faaauleleiina o lauao ma atigilima o tamaitai, o le fofoina o tino tiga, o galuega tusiata ma le valivaliina o ata a le fanau, o lavalava na foai fua, o taaloga a le fanau faapea meaai na saunia lava e lenei faalapotopotoga na ofo fua uma lava i le mamalu o le atunuu.
Sa maua foi le zumba e faagaioi ai le tino e faalalo ai le suka ma le toto maualuga. Na vaevae uma talavou i vaega taitasi i totonu o le fale e galulue ai auā le faatalatalanoaina o tagata na agai atu. O le sini autu na agai i ai lenei polokalame o le fesoasoani i tagata i le itu le tino ma le taumafai e momoli atu le feau o le talalelei ma le faaolataga i le itu faaleagaga. Na molimauina le fiafia o tagata i lenei auaunaga ona ua maua se faasiliga malosi mo i latou faapea o latou aiga.
O le Aso Toonai na faamae‘a ai lenei faamoemoe ma faaiu ai i le polokalame faaevagelia na faatinoina lava i le malumalu o le ekalesia o le Life Church i Manurewa. Ma ua iai foi le naunautaiga o lenei faalapotopotoga o le Servolution o le a toe faataunuuina i le tausaga fou i le alofa o le Atua e aulia atu lena taimi ma le manuia.
